2018 jyldyń ekinshi jartysynan bastap, «Eir Astana», «QazMunaiGaz», «Qazatomónerkásip» syndy ulttyq kompaniialardy jekeshelendirý bastalady, dep habarlaidy "Ult aqparat" QazAqparat agenttigine silteme jasap.
Bul týraly «Astana» halyqaralyq qarjy ortalyǵynyń (AHQO) basqarýshysy Qairat Kelimbetov QR Syrtqy ister ministrliginde ótken «EKSPO-2017 murasy» atty dóńgelek ústelde málim etti.
«Ózderińiz biletindei, kelesi jyly «Samuryq-Qazyna» ulttyq kompaniialarmen birlesip, jekeshelendirý baǵdarlamalaryn bastaidy. «Samuryq-Qazyna» eki jyldan beri «Eir Astana», «QazMunaiGaz», «Qazatomónerkásip» jáne ózge de kompaniialardy jekeshelendirýdi josparlap júr. Mundai jekeshelendirýler 2018 jyldyń ekinshi jartysynda bastalady dep josparlanýda. Jáne barlyq jumystar AHQO alańynda júzege asyrylady dep úmittenemiz», - dedi Q.Kelimbetov.
Onyń aitýynsha, qazirgi ýaqytta AHQO «kapitaldy naryq sekildi birqatar máselelermen ainalysýda».
«Qazaqstanda kapital naryǵyn qaita iske qosýǵa talpynýdamyz. Sondai-aq, bul jumystar Qazaqstandaǵy jekeshelendirý isine de qatysty bolmaq», - dep atap ótti AQHO basqarýshysy.
Eske sala ketsek, «Astana» halyqaralyq qarjy ortalyǵy (AHQO) 2018 jyldyń 1 qańtarynda tolyqqandy jumysyn bastaidy jáne onyń halyqaralyq tanystyrylymy 2018 jyldyń 5 shildesine josparlanǵan.
