Seisenbi kúni Eýroparlament basym daýyspen Ýkrainaǵa Eýroodaqqa múshe bolý úshin úmitker memleket degen mártebe berý jónindegi rezoliýtsiiany qoldady. Alaida EO-ǵa múshe bolý úshin belgili bir erejeler saqtalýy qajettigi aitylǵan.
Ýkraina biligi EO-ǵa múshe bolyp kirý jónindegi ótinishin jedel qabyldaýyn suraǵan.
Rezoliýtsiia Resei áskeri kúshteriniń Ýkrainaǵa basyp kirýi jáne Belarýs prezidenti Aleksandr Lýkashenkonyń áreketin aiyptaidy. Sonymen birge álem qaýymdastyǵyn Ýkrainaǵa gýmanitarlyq kómek kórsetip, bosqyndarǵa qol ushyn berýge shaqyrady.
Rezoliýtsiiada Reseiden munai jáne gaz alýdy shekteýdi, EO-ǵa Reseige investitsiia quiýdy toqtatýdy, sonymen birge SWIFT júiesinen óshirý talap etilgen. Resei men Belarýstiń joǵary laýazymdy sheneýnikterine qarsy sanktsiia salýǵa qoldaý kórsetedi.
Eýropa depýtattary Ýkraina prezidenti Vladimir Zelenskii video arqyly bailanysqa shyqqan kezde oryndarynan turyp qol shapalaqtady. Zelenskii sózinde ýkrainalyqtar myńdaǵan adamyn qurban etý arqyly Resei agressiiasyna qarsy turyp, Eýroodaq elderin Ýkrainaǵa qoldaý kórsetý maqsatynda biriktire aldy dedi. Prezident sózinde Ýkraina eýropalyq baǵytty tańdaitynyn, teń quqyqty eýropalyq ulttyń ókili bolyp, Eýroodaqqa múshe bolǵysy keletinin aitty.
Negizgi ereje boiynsha, EO-ǵa múshe bolý kóptegen jyldardy qajet etedi. Keide on jylǵa sozylady. Birqatar elder Ýkrainany EO-ǵa kirýdi tezdetýdi qoldady.
