QR Prezidenti janyndaǵy Adam quqyqtary jónindegi komissiianyń tóraǵasy Igor Rogov Eýropalyq Parlamenttiń Qazaqstan jónindegi qararyna óz pikirin bildirdi, dep habarlaidy QazAqparat.
«Shynymdy aitsam, depýtattar áli zańdy baǵasyn almaǵan oqiǵalarǵa saiasi baǵa berip, asyǵystyq tanytty. Quqyq qorǵaý organdarynyń pikiri joq, birde-bir sot sheshimi shyqpaǵanyn da aitpai-aq qoiaiyn. Qazirdiń ózinde qandai da bir gipotetikalyq formalarda sipattama berilip jatyr. Birqatar quqyqtyq uǵymdar naqtylaý men jetildirýdi qajet etetinimen kelisemin. Olar «terrorizm» terminin keńinen qoldandy dep aiyptap otyr. Men de buǵan nazar aýdardym. Shynynda da, zańdy turǵydan alǵanda bul uǵymmen áli jumys isteý kerek shyǵar. Biz terrorizmge neni jatqyzýǵa bolatyny jóninde halyqaralyq, eýropalyq standarttardy bilgimiz keledi. Árine, belgili bir qujattar túri bar ekenin túsinemin. Biraq, AQSh-ty uly demokratiialyq el dep esh sarkazmsyz, mysqylsyz aita alamyn. Onda adamdar Kongress ǵimaratyn qarýsyz basyp alǵanda, ishki terrorister degen ataý berildi. Olarda esh qarý bolǵan joq. Sondyqtan bul terminge esh qarsylyq tanytpaimyn. Dál osy jaǵdaiymyzda eýropalyq depýtattar qarý qoldanyp qana qoimai, quqyq qorǵaý organdarynyń 19 qyzmetkerin óltirip, basyn kesip alǵandardy terrorist dep atamaityny tańqalarlyq», - dep túsindirdi Igor Rogov.
Spikerdiń pikirinshe, bizdiń quqyǵymyzda jetkilikti túrde pysyqtalmaǵan birqatar uǵym bar.
«Aitaiyn degenim, bizdiń Konstitýtsiia azamattarǵa beibit demonstratsiialarǵa, qarýsyz piketterge shyǵýǵa quqyq beredi. Bul oqiǵalardyń barlyǵy beibit narazylyqtardan bastalǵanymen de kelisemin. Alǵashqy oqiǵalarǵa durys baǵa berildi, olardyń kóptegen talaptary ádil boldy, áitpese ol talaptar qanaǵattandyrylmas edi. Beibit sherý jappai tártipsizdikke ulasqan kezde, jaqynda kóshedegi jastarǵa kólikten armatýra taratylǵany týraly video jariialandy. Jańa quqyqtyq memlekettiń negizin salý úshin armatýralar taratylatynyna sený qiyn. Bul qarý ma, álde nemene? Beibit narazylyq pa álde qarýly ma?», - deidi spiker.
Igor Rogov olardyń alańdaýshylyǵyn túsinetinin, biraq Eýroparlament depýtattary asyǵystyq tanytqanyn aitty.
«Eger siz eldi nemese ózderińizge júginetin adamdardy qurmetteseńiz, resmi baǵalaýdy kútińiz, naqty bir aktiler bolýy kerek. Al qazir eshteńe joq. Olar Prezidentti beibit narazylyq bildirýshilerge oq jaýdyrýǵa buiryq berdi dep aiyptap otyr. Bul úndeýdi bárimiz oqydyq jáne estidik. Munda terrorister týraly aitylǵan bolatyn. Quqyq qorǵaý organdary men kúsh qurylymdarynyń qarý qoldana alatyn jaǵdailary tikelei jazylǵan zańnamalyq aktiler men zań bar. Adam quqyqtary jónindegi komissiianyń tóraǵasy retinde biylǵy alǵashqy otyrystardyń birin adam quqyqtary men bostandyqtaryn saqtaý máselelerine arnaityn shyǵarmyn. Onda adam quqyqtaryn qorǵaý, beibit demonstratsiialar, sherýler quqyǵy jáne onyń eń qymbat qazynasy adam, onyń ómiri, quqyq qorǵaý salasyndaǵy quqyqtary men bostandyqtaryn saqtaý bolyp tabylatyn demokratiialyq quqyqtyq áleýmettik memleket uǵymymen bailanysty ekeni aitylady. Eýropalyq depýtattar tártip saqshylarynyń ómiri basqasha dep sanai ma? Konstitýtsiiada ár adamnyń ózin, jaqyndaryn qorǵaýǵa quqyǵy bar delingen. Qajetti qorǵanys uǵymy qylmystyq kodekste de jazylǵan», - dep túsindirdi Igor Rogov.
«Meni tań qaldyratyny – birneshe myń shaqyrym jerdegi eýropalyq depýtattar úzildi-kesildi baǵa berdi jáne tipti sanktsiia qoldanýdyń az-aq aldynda tur. Men Eýropa Keńesiniń ókilderimen sóilestim. Onda olardyń bizdiń quqyq qorǵaý organdarynyń qyzmetkerleri úshin beibit sherýlerdi túsinýdegi eýropalyq standarttar boiynsha vebinarlar ótkizýge ýaǵdalastyq. Túrli elderdiń zańgerlerinen bostandyq pen mitingter týraly eýropalyq túsinikterdi talqylaý týraly usynystar tústi.
Prezidenttiń quqyq qorǵaý organdarynyń bul oqiǵalarǵa daiyn emestigin aitqany óte durys. Ol uiymdastyrýshylyq pen jabdyqtalýyn jáne jalpy daiyndyq máselesin aitty. Meniń oiymsha, bizdiń quqyq qorǵaý júiesi «adam quqyqtary» sózin zańdyq jáne teoriialyq turǵydan túsinýge daiyn emes bop shyqty. Zańger retinde osy olqylyqtyń ornyn toltyryp, eýropalyq áriptesterimizdiń pikirin bilýimiz kerek dep sanaimyn», - dedi Igor Rogov.
