Eýropalyq odaqqa múshe memleketter Qazaqstanmen jan-jaqty yntymaqtastyqty odan ári nyǵaitýǵa jáne Prezident Qasym-Jomart Toqaevtyń eldi saiasi jáne áleýmettik-ekonomikalyq jańǵyrtý baǵytyn dáiekti qoldaýǵa múddeli. Bul týraly jáne jalpy kún tártibindegi basqa da ózekti máseleler boiynsha búgin QR Premer-Ministriniń orynbasary – Syrtqy ister ministri Muhtar Tileýberdiniń Qazaqstanda akkredittelgen Eýropalyq odaqqa múshe memleketterdiń elshilerimen kezdesýinde aityldy, dep habarlaidy QazAqparat syrtqy saiasi vedomstvonyń baspasóz qyzmetine silteme jasap.
Kezdesýdiń negizgi taqyryptary investitsiialyq, saýda-ekonomikalyq, saiasi jáne mádeni-gýmanitarlyq yntymaqtastyqty jandandyrý, aǵymdaǵy jylǵy qańtardaǵy qaiǵyly oqiǵalardan keiingi Qazaqstandaǵy qazirgi ahýal, sondai-aq odan ári ekijaqty jáne kópjaqty ózara is-qimyldyń basymdyqtaryn talqylaý boldy.
Óz sózinde Ministr eýropalyq tarapty el basshylyǵynyń «qaiǵyly qańtar» saldary aiasynda Jańa Qazaqstandy qurýdaǵy negizgi tásilderi týraly habardar etti jáne memlekettiń odan ári demokratiialyq qaita qurý baǵytyna beiildiligin rastady.
«Eýropalyq odaqpen biz senimge, ózara qurmetke jáne ortaq basymdyqtarǵa negizdelgen berik qatynastar ornattyq. Bul qatynastar jahandyq jáne óńirlik qaýipsizdikti qamtamasyz etýdegi senimdi seriktestikpen, serpindi saýda yntymaqtastyǵymen, sondai-aq berik saiasi bailanystarmen nyǵaitylýda», - dep atap ótti ministr.
Is-shara aiasynda Qazaqstannyń Ulttyq ekonomika birinshi vitse-ministri Timýr Jaqsylyqov eýropalyq diplomattardy elimizdiń 2021 jylǵy ekonomikalyq damýynyń negizgi qorytyndylary týraly habardar etip, sondai-aq eldegi qańtar aiyndaǵy oqiǵalar aiasynda Úkimet aldyna qoiylǵan ózekti mindetterge jeke toqtaldy.
«Prezident Qasym-Jomart Toqaev birqatar mańyzdy bastamalardy usyndy, olardy iske asyrý elimizdiń jańa ekonomikalyq irgetasyn qalyptastyrýǵa múmkindik beredi. Qazirgi ýaqytta Ulttyq ekonomika ministrligi inkliýzivti ekonomikalyq ósýdi yntalandyrýǵa, makroekonomikalyq turaqtylyqty qamtamasyz etýge jáne kásipkerlikti damytýǵa baǵyttalǵan «QR Úkimetiniń 2022 jylǵa arnalǵan is-qimyl baǵdarlamasyn» kelisý jáne bekitý boiynsha belsendi jumys isteýde», - dep atap ótti óz sózinde vitse-ministr.
EO-nyń Qazaqstandaǵy ókildiginiń basshysy Elshi Kestas Iankaýskas atap ótkendei, «Qazaqstan Eýropalyq odaqtyń Ortalyq Aziiadaǵy óte mańyzdy áriptesi jáne eldiń odan ári damýyna, ásirese saiasi reformalar men demokratiialandyrýǵa qatysty máselelerdi berik qoldaýǵa niettimiz». Elshiniń aitýynsha, «Eýropalyq áriptester jaqynda bolǵan oqiǵalardyń keshendi sipatyn da túsinedi», osyǵan bailanysty obektivti tergeý júrgizýdiń mańyzdylyǵyn atap ótti jáne Qazaqstannyń ýákiletti memlekettik organdarynyń tergeýdiń aldyn ala nátijelerin jariia etýin kútýde. Osy turǵyda kezdesýde Bas prokýratýra tergeý is-sharalaryn júrgizý kezinde jol berilgen buzýshylyqtar týraly shaǵymdar boiynsha 170 qylmystyq is qozǵaǵany týraly aqparat erekshe atap ótildi.
Frantsiia Elshisi Dide Kanesstiń aitýynsha, «Eýropalyq keńestegi frantsýz tóraǵalyǵy (2022 jyldyń birinshi jartysynda) biz úshin Ortalyq Aziiadaǵy negizgi áriptes bolyp tabylatyn Qazaqstanmen yntymaqtastyqty nyǵaitýǵa baǵyttalǵan». Tóraǵalyqtyń óńirlik basymdyqtary arasynda ol Qazaqstandaǵy odan arǵy demokratiialyq ózgerister salasyndaǵy kún tártibin qosa alǵanda, EO men Qazaqstan arasyndaǵy Keńeitilgen áriptestik pen yntymaqtastyq týraly kelisimniń erejelerin tolyq iske asyrýdy; «kovidtan keiingi» ekonomika men investitsiialyq ahýaldy qalpyna keltirýdi; «jasyl» ekonomikany qurýdy; Ortalyq Aziiada jáne Eýropamen kólik salasyndaǵy turaqty ózara bailanystylyqty qamtamasyz etýdi atady.
Odan ári pikir almasý barysynda eýropalyq diplomattar elimizdegi áleýmettik-ekonomikalyq jáne saiasi reformalar baǵdarlamasyna qoldaý bildirip, EO-nyń qazaqstan-eýropalyq áriptestikti nyǵaitý úshin zań ústemdigi men demokratiialandyrý máselelerinde Qazaqstanmen odan ári syndarly dialog júrgizýge ázir ekenin atap ótti.
Osy turǵyda bilik pen azamattyq qoǵamnyń, onyń ishinde Ulttyq qoǵamdyq senim keńesi jáne QR SIM janyndaǵy Konsýltativtik-keńesshi organ «Adami ólshem jónindegi dialog alańy» siiaqty alańdardy qoldaný arqyly tiimdi ózara is-qimylynyń mańyzdy róli atap ótildi. Jalpy alǵanda, kezdesý ekijaqty jáne kópjaqty yntymaqtastyqtyń keń aýqymdy máselelerin talqylaýǵa jáne saiasi dialogty odan ári tereńdetýge, saýda-ekonomikalyq jáne investitsiialyq ózara is-qimyldy keńeitý jóninde pikir almasýǵa múmkindik berdi.
