Eýropalyq Odaqtyń Qazaqstandaǵy elshisi Kestýtis Iankaýskas Qazaqstan Prezidenti Qasym-Jomart Toqaevtyń halyqqa Joldaýyn keńeitilgen saiasi baǵdarlamaǵa teńedi, dep habarlaidy QazAqparat.
«Bul Joldaý óte ózekti. Búgingi Joldaýdan keńeitilgen saiasi baǵdarlamany estidik. Tek saiasi reforma ǵana emes, Prezident Toqaevtyń jyl basynda aitqan áleýmettik-ekonomikalyq reformalardy tolyqtyrǵanyn kórdik. Biz osy reformalardyń bárin tolyq qoldaimyz. Olar óte tiimdi bolýy múmkin», - deidi Kestýtis Iankaýskas.
Diplomat Memleket basshysynyń basqa usynystaryna da toqtaldy.
«Biz demokratiialandyrý úderisteriniń jalǵasatynyn, memlekettik bilikti ortalyqsyzdandyrý jónindegi usynystardy estidik. Sondai-aq, BAQ-taǵy sóz bostandyǵy men saiasi partiialardy tirkeýdi ońailatý jaǵy sóz boldy. Jańa qaýymdastyq qurý eshqashan kesh emes. Biz óz tájiribemizde qoǵamdy nólden bastap ózgertpei-aq qurýǵa bolatynyn kórdik. Eýropalyq odaq ókili retinde biz Prezidenttiń Eýropany birneshe ret jaqsy úlgi retinde atap ótkenine qýanyshtymyz. Biz muny quptaimyz. Sondai-aq, Eýropa qaýipsizdik jáne yntymaqtastyq uiymynyń sailaý saiasatyna qatysty standarttary da aityldy», - deidi elshi.
