Eýropa odaǵy Ýkrainaǵa áskeri joiǵysh ushaqtaryn kómekke beredi. Buǵan deiin Kiev Reseidiń jerdegi jáne áýedegi shabýylyna toitarys berý úshin Eýropa odaǵynan kómek suraǵan.
Bul jóninde 27 aqpanda Eýropa odaǵynyń syrtqy saiasi vedomstvosynyń basshysy Jozep Borrel habarlady. Ol Briýsseldiń Ýkrainaǵa meilinshe kómektesýge daiyn ekenin atap ótken.
Borrell sózinshe, Resei Ýkrainaǵa qoldaý kórsetken elderge iadrolyq qarý qoldanýy múmkin ekenin anyq ańǵartqan.
"Vladimir Pýtin Ýkraina soldattaryn qarýlaryn tastaýǵa shaqyrdy jáne Ýkrainaǵa kómekteskisi keletin elderge qarata "kimde-kim bizge kedergi jasaǵysy kelse, Reseidiń jyldam jaýap beretinin jáne onyń buryn-sońdy tarihta bolmaǵan zardabyn tartatynyn" aitty". Pýtinniń jeksenbidegi sózine orai sóilegen Borrel áńgime iadrolyq qarý týraly ekenin, biraq ol Eýropa odaǵynyń Ýkrainaǵa kómegin toqtata almaitynyn málimdedi.
Ýkraina Syrtqy ister ministri Dmitrii Kýleba Eýropa odaǵynyń basshylyǵyna ýkrain ushqyshtary áskeri joiǵysh ushaqtarǵa zárý bolyp otyrǵanyn aitqan. Osyǵan orai «Nemis tolqyny» Ýkraina qarýly kúshterinde joiǵysh ushaqtyń sovettik Sý-27 jáne MiG-29 túrleri bar ekenin eske salǵan.
Jeksenbide Jozep Borrel Eýropa blogynyń atynan sóilegen sózinde "Reseidiń Ýkrainaǵa basyp kirýi Grýziia, Moldova, Batys Balqan elderine da áser etýi múmkin" dedi.
27 aqpanda Eýropa odaǵy elderiniń syrtqy ister ministrleri kezdesýinen keiin Reseige qatań sanktsiia salýǵa kóshetini habarlanǵan. Eýro komissiia basshysy Ýrsýla fon der Liaien sózinshe, Eýropa odaǵy Ýkrainaǵa qarý-jaraq pen ózge de tehnikalyq quraldar satyp alý, jetkizýdi qarjylandyrady. Fon der Liaien Eýropa odaǵynyń mundai qadamǵa alǵash ret baryp otyrǵanyn atap ótti.
Jeksenbi kúni Bloomberg agenttigi Eýropa odaǵy Pýtinniń ainalasynda júrgen Resei sheneýnikteri men oligarhtarynyń taǵy bir tobyna sanktsiia salýy múmkin ekenin jariialaǵan edi. Bloomberg málimetine qaraǵanda, bul tizimge Álisher Ýsmanov, Mihail Fridman, Aleksei Mordashov, Dmitrii Peskov jáne Sergei Roldýgin kirýi múmkin.
