Biyl UEFA Eýropa ligasynda baq synaityn qazaqstandyq klýbtardyń úshinshi irikteý satysynda kezdesýi múmkin qarsylastary anyqtaldy, dep habarlaidy "Ult aqparat".
Elordalyq «Astana» ekinshi irikteý satysynda Chernogoriianyń «Býdýchnost» komandasymen kezdesedi. Atalǵan oiynda jeńgen jaǵdaida «Astana» týrnirdiń kelesi satysynda Bosniia jáne Gertsogovinanyń «Saraevo» klýbymen oinaidy.
Almatynyń «Qairaty» úshinshi irikteý satysynda Reseidiń «Rostov» klýbymen tartysqa túsýi múmkin. Ol úshin almatylyq ujym ekinshi irikteý satysynda Izraildiń «Makkabi» (Haifa) men Bosniia jáne Gertsogovinanyń «Jeleznichar» klýbynyń jeńimpazyn orta jolda qaldyrýy tiis. Aita ketelik, ekinshi irikteý satysyndaǵy «Makkabi» men «Jeleznichar» arasyndaǵy kezdesý qos komanda qyzmetkerlerinde koronavirýs infektsiiasyna shaldyǵý dereginiń tirkelýine bailanysty 9 qyrkúiekke shegerilgen edi.
Al «Qaisar» ekinshi irikteý satysynda aldymen Kiprdiń APOEL klýbyn tize búktirýi tiis. Odan keiin týrnirdiń kelesi satysynda Sloveniianyń «Olimpiia» (Liýbliana) men Bosniia jáne Gertsogovinanyń «Zrinski» jubynyń jeńimpazymen sheberlik baiqasady.
Esterińizge sala ketelik, Eýropa ligasy ekinshi irikteý satysy 17, úshinshi irikteý satysy 24 qyrkúiekke belgilengen. Týrnirdiń irikteý satysyndaǵy barlyq jeńimpazy tek bir oiyn nátijesi boiynsha anyqtalady.
