Búgin Eýropa qurlyǵynda Ulttar ligasy toptyq kezeńiniń besinshi týr oiyndary bastaldy. Atalmysh básekede D ligasynyń birinshi tobynda synǵa túsip jatqan Qazaqstan quramasy óz alańynda Latviiamen sheberlik baiqasty, dep habarlaidy "QazAqparat".
Toptyq kezeńdegi quramalar jaǵdaiy týraly budan buryn habarlaǵan edik. Qos quramanyń da ekinshi orynǵa turaqtaityn múmkindigi bar bolatyn. Búgingi oiyn sol saýaldyń jaýabyn sheshýi kerek-tin. Sol sebepti eki komandanyń bul oiynda tartysty báseke ótkizetini belgili edi.
Ulttyq quramalar 13 qazanda Latviiada bir oiyn ótkizgen edi. Ol kezdesý 1:1 esebimen aiaqtalǵan. Odan keiin bizdiń jigitter óz alańynda Andorrany 4:0 esebimen oisyrata jeńdi. Al, Latviia óz alańynda Grýziiadan 0:3 esebimen súrindi.
Qazaqstan quramasynyń bas bapkeri Stanimir Stoilov alǵashqy minýttan negizgi quramǵa Nenad Erich, Ǵafýrjan Súiimbaev, Sergei Malyi, Iýrii Logvinenko, Abzal Beisebekov, Georgii Jýkov, Baýyrjan Islamhan, Serikjan Mýjikov, Bahtier Zainýtdinov, Roman Mýrtazaev, Baýyrjan Turysbekterdi qosty. Al Latviia quramasy sapynda Andris Vanin, Vladislav Gabov, Kaspars Dýbra, Vitalii Iagodinski, Vitalii Maksimenko, Igor Tarasov, Andrei Tsiganik, Viacheslav Isaev, Denis Rakel, Artýr Karashaýsks, Valerii Shabala shyqty.
Kezdesý bizdiń qurama basymdyǵymen bastaldy. Soqqylardyń deni qaqpa torynda týlap jatsa, kezdesý Qazaqstannyń iri jeńisimen aiaqtalar edi. Degenmen qazaqstandyq fýtbolshylar óz múmkindikterin paidalaryna jarata alǵan joq. Qurama kapitany mindetin atqarǵan Baýyrjan Islamhannyń ózi gol soǵatyn sátterde mergendik kórsete almady.
Aldaǵy oiynshylarǵa qorǵaýshylar da kómekke kelip jatty. Ońtaily sátterde olar da qarsylastar qaqpashysyn qapy qaldyrý joldaryn izdedi. Ulttyq qurama men Almatynyń «Qairat» komandasynda sol qanatta oinaityn Ǵafýrjan Súiimbaev 37-minýtta mergendik tanytty. Qorǵaýshynyń alystan tepken doby qaqpa toryna tústi. Budan keiin qos qurama gol soǵatyn múmkindikter izdedi. Birinshi kezeńdi 1:0 esebimen Qazaqstan jeńispen aiaqtady.
Ekinshi taim bastala salysymen Latviia tarazy basyn teńestirýge umtyldy. Osylaisha kózdegen maqsattaryna jetti. Qarsylas komanda sapynan 49-minýtta Denis Rakel gol soǵyp, tarazy basy teńestirdi. Budan keiin alań ieleri alǵa umtylǵanmen, odan oń nátije kele qoiǵan joq. Oiyn 1:1 esebimen aiaqtaldy.
Atalmysh topta búgin taǵy bir oiyn bolady. Saǵat 01:45-te Andorra men Grýziia quramalary sheberlik baiqasady.
