بٷگٸن ەۋروپا قۇرلىعىندا ۇلتتار ليگاسى توپتىق كەزەڭٸنٸڭ بەسٸنشٸ تۋر ويىندارى باستالدى. اتالمىش بەسەكەدە د ليگاسىنىڭ بٸرٸنشٸ توبىندا سىنعا تٷسٸپ جاتقان قازاقستان قۇراماسى ٶز الاڭىندا لاتۆييامەن شەبەرلٸك بايقاستى, دەپ حابارلايدى "قازاقپارات".
توپتىق كەزەڭدەگٸ قۇرامالار جاعدايى تۋرالى بۇدان بۇرىن حابارلاعان ەدٸك. قوس قۇرامانىڭ دا ەكٸنشٸ ورىنعا تۇراقتايتىن مٷمكٸندٸگٸ بار بولاتىن. بٷگٸنگٸ ويىن سول ساۋالدىڭ جاۋابىن شەشۋٸ كەرەك-تٸن. سول سەبەپتٸ ەكٸ كوماندانىڭ بۇل ويىندا تارتىستى بەسەكە ٶتكٸزەتٸنٸ بەلگٸلٸ ەدٸ.
ۇلتتىق قۇرامالار 13 قازاندا لاتۆييادا بٸر ويىن ٶتكٸزگەن ەدٸ. ول كەزدەسۋ 1:1 ەسەبٸمەن اياقتالعان. ودان كەيٸن بٸزدٸڭ جٸگٸتتەر ٶز الاڭىندا اندوررانى 4:0 ەسەبٸمەن ويسىراتا جەڭدٸ. ال, لاتۆييا ٶز الاڭىندا گرۋزييادان 0:3 ەسەبٸمەن سٷرٸندٸ.
قازاقستان قۇراماسىنىڭ باس باپكەرٸ ستانيمير ستويلوۆ العاشقى مينۋتتان نەگٸزگٸ قۇرامعا نەناد ەريچ, عافۋرجان سٷيٸمباەۆ, سەرگەي مالىي, يۋريي لوگۆينەنكو, ابزال بەيسەبەكوۆ, گەورگيي جۋكوۆ, باۋىرجان يسلامحان, سەرٸكجان مۋجيكوۆ, باحتيەر زاينۋتدينوۆ, رومان مۋرتازاەۆ, باۋىرجان تۇرىسبەكتەردٸ قوستى. ال لاتۆييا قۇراماسى ساپىندا اندريس ۆانين, ۆلاديسلاۆ گابوۆ, كاسپارس دۋبرا, ۆيتاليي ياگودينسكي, ۆيتاليي ماكسيمەنكو, يگور تاراسوۆ, اندرەي تسيگانيك, ۆياچەسلاۆ يساەۆ, دەنيس راكەل, ارتۋر كاراشاۋسكس, ۆالەريي شابالا شىقتى.
كەزدەسۋ بٸزدٸڭ قۇراما باسىمدىعىمەن باستالدى. سوققىلاردىڭ دەنٸ قاقپا تورىندا تۋلاپ جاتسا, كەزدەسۋ قازاقستاننىڭ ٸرٸ جەڭٸسٸمەن اياقتالار ەدٸ. دەگەنمەن قازاقستاندىق فۋتبولشىلار ٶز مٷمكٸندٸكتەرٸن پايدالارىنا جاراتا العان جوق. قۇراما كاپيتانى مٸندەتٸن اتقارعان باۋىرجان يسلامحاننىڭ ٶزٸ گول سوعاتىن سەتتەردە مەرگەندٸك كٶرسەتە المادى.
الداعى ويىنشىلارعا قورعاۋشىلار دا كٶمەككە كەلٸپ جاتتى. وڭتايلى سەتتەردە ولار دا قارسىلاستار قاقپاشىسىن قاپى قالدىرۋ جولدارىن ٸزدەدٸ. ۇلتتىق قۇراما مەن الماتىنىڭ «قايرات» كومانداسىندا سول قاناتتا وينايتىن عافۋرجان سٷيٸمباەۆ 37-مينۋتتا مەرگەندٸك تانىتتى. قورعاۋشىنىڭ الىستان تەپكەن دوبى قاقپا تورىنا تٷستٸ. بۇدان كەيٸن قوس قۇراما گول سوعاتىن مٷمكٸندٸكتەر ٸزدەدٸ. بٸرٸنشٸ كەزەڭدٸ 1:0 ەسەبٸمەن قازاقستان جەڭٸسپەن اياقتادى.
ەكٸنشٸ تايم باستالا سالىسىمەن لاتۆييا تارازى باسىن تەڭەستٸرۋگە ۇمتىلدى. وسىلايشا كٶزدەگەن ماقساتتارىنا جەتتٸ. قارسىلاس كوماندا ساپىنان 49-مينۋتتا دەنيس راكەل گول سوعىپ, تارازى باسى تەڭەستٸردٸ. بۇدان كەيٸن الاڭ يەلەرٸ العا ۇمتىلعانمەن, ودان وڭ نەتيجە كەلە قويعان جوق. ويىن 1:1 ەسەبٸمەن اياقتالدى.
اتالمىش توپتا بٷگٸن تاعى بٸر ويىن بولادى. ساعات 01:45-تە اندوررا مەن گرۋزييا قۇرامالارى شەبەرلٸك بايقاسادى.
