Búgin fýtboldan Eýropa chempionaty shirek finalynda eki oiyn ótkiziledi, dep habarlaidy "Ult aqparat".
Shirek final oiyndary 2 jáne 3 shilde kúnderine belgilengen. Búgin – eki, erteń eki jup ózara sheberlik baiqasady.
Jarystyń atalǵan satysynda alǵashqy kezdesý Shveitsariia men Ispaniia quramalary arasynda bolady. Oiyn elorda ýaqytymen 21.50-de bastalyp, «Qazaqstan» men «Qazsport» telearnalarynan tikelei efirde kórsetiledi.
Kezdesý Reseidiń Sankt-Peterbýrg qalasyndaǵy «Gazprom-arena» stadionynda ótkiziledi. Oiynda angliialyq Maikl Oliver bas qazy qyzmetin atqarady.
Eki qurama buǵan deiin 24 márte kezdesti. Onyń 18-de Ispaniia basym túsip, 1-de Shveitsariia jeńse, qalǵanynda teń esep tirkeldi. 2010 jyldyń 16 maýsymynda álem chempionaty finaldyq satysynda Shveitsariia atalǵan qarsylasynan 1:0 esebimen jeńilgen bolatyn.
Eske salsaq, jarystyń 1/8 finalynda Ispaniia Horvatiiany, Shveitsariia Frantsiiany orta jolda qaldyryp ketti.
Búgingi taǵy bir kezdesýde Belgiia men Italiia quramalary jasyl alańǵa shyǵady. Oiyn elorda ýaqytymen 00.50-de bastalyp, «Qazaqstan» telearnasynan tikelei efirde kórsetiledi.
Oiyn Germaniianyń Miýnhen qalasyndaǵy «Aliants-arena» stadionynda ótkizilip, onda sloveniialyq Slavko Vinchich bas tóreshi qyzmetin atqarady.
Eki qurama buǵan deiin 22 márte kezdesti. Onyń 4-de Belgiia basym túsip, 14-de Italiia jeńse, qalǵanynda teń esep tirkeldi. Sońǵy ret Belgiia Italiiany 2015 jyldyń 13 qarashasynda joldastyq kezdesýde 3:1 esebimen jeńgen bolatyn.
Sondai-aq, jarystyń atalǵan satysynda 3 shildede Chehiia men Daniia, Ýkraina men Angliia quramalary kezdesedi.
Aita keteiik, 1/8 finalda Belgiia Portýgaliiany, Italiia Avstriiany orta jolda qaldyryp ketti.
