Búgin fýtboldan 2020 jylǵy Eýropa chempionatynyń finaldyq kezeńinde úsh oiyn bolady, dep habarlaidy "Ult aqparat".
Búgingi oiyndar S jáne D toptarynda ótkiziledi.
Alǵashqy kezdesýde D tobyndaǵy Angliia men Horvatiia quramalary jasyl alańǵa shyǵady. Oiyn Angliia astanasy London qalasyndaǵy «Ýembli» stadionynda bolady.
Eki qurama buǵan deiin 10 márte kezdesti. Onyń ekeýinde horvattar jeńiske jetse, beseýinde aǵylshyndar basym túsip, úsh oiyn teń aiaqtaldy.
Eýropa chempionaty finaldyq satysyna Angliia buǵan deiin toǵyz márte qatysty. 1968, 1996 jyldarda qola júldeger atandy. Al Horvatiia bes márte oinap, 1996, 2000 jyldarda shirek finalǵa deiin jetti.
Oiyn elorda ýaqytymen 18.50-de bastalyp, «Qazaqstan» telearnasynan tikelei efirde kórsetiledi.
S tobyndaǵy alǵashqy kezdesýde Avstriia men Soltústik Makedoniia quramalary sheberlik baiqasady. Oiyn Rýmyniia astanasy Býharest qalasyndaǵy Natsional stadionynda ótedi.
Eki qurama buǵan deiin eki márte sheberlik baiqasqan. Ekeýinde de avstriialyq fýtbolshylar jeńiske jetti.
Qurlyqtyq dodanyń finaldyq satysynda avstriialyq fýtbolshylar úshinshi márte baq synaidy. Budan buryn olar 2008, 2016 jyldarda toptyq kezeńde oinady.
Soltústik Makedoniia Eýropa chempionaty finaldyq satysyna tuńǵysh ret joldama alyp otyr. Ázirge budan basqa qol jetkizgen joǵary nátijesi joq.
Kezdesý elorda ýaqytymen 21.50-de bastalyp, «Qazaqstan» telearnasynan tikelei efirde kórsetiledi.
Úshinshi oiyn kúnin S tobyndaǵy Niderlandy jáne Ýkraina quramalary qorytyndylaidy. Kezdesý Niderlandy astanasy Amsterdam qalasyndaǵy Iohan Krýiff stadionynda bolady.
Eki qurama buǵan deiin eki márte kezdesti. Bireýinde niderlandylyq fýtbolshylardyń mereii ústem bolsa, bireýinde teń nátije tirkeldi.
Qurlyqtyq dodaǵa toǵyzynshy márte qatysqan niderlandylyq qurama 1988 jyly chempion atansa, tórt márte qola júldege qol sozdy.
Ýkraina quramasy biyl úshinshi márte kári qurlyqtaǵy úzdikter qatarynda synǵa túsedi. Budan buryn 2012, 2016 jyldarda toptyq kezeńnen árige asa alǵan joq.
Kezdesý elorda ýaqytymen 00:50-de bastalyp, «Qazsport» telearnasynan tikelei efirde kórsetiledi.
