Eýropalyq odaqtyń Ortalyq Aziia boiynsha arnaiy ókili Piter Býrian qyrǵyz-tájik shekarasyndaǵy qarýly qaqtyǵys týraly pikir bildirdi, dep habarlaidy "Ult aqparat".
«Meniń oiymsha, Qyrǵyzstan men Tájikstan arasyndaǵy shekaradaǵy qaqtyǵys shekarany delimitatsiialaý jáne demarkatsiialaý, birlesken sý resýrstaryn basqarý mańyzdy másele ekenin kórsetip otyr. Bul – tez arada sheshilýi qajet, óte mańyzdy syn-qater deýge bolady», - dedi Piter Býrian Nur-Sultanda ótken jýrnalistermen kezdesýde.
Eýroodaq ókili shekara memleketterdi ajyratpai, kerisinshe biriktiretin faktor bolý kerektigin atap ótti
«Biz aradaǵy kelissózderdi shekaralardy basqarýdyń óńirlik BOMCA baǵdarlamasy arqyly qoldaýǵa daiynbyz. Bul baǵdarlama 22 million eýro kóleminde qarjylai qoldaýǵa ie boldy, oǵan Aýǵanstan da kiredi», - dedi EO-nyń Ortalyq Aziia boiynsha arnaiy ókili.
Sondai-aq, ol shekaradaǵy bailanystardyń yntymaqty damýy óńirdegi esirtki ainalymyna da tosqaýyl bolatynyn eske saldy.
«Shekara mańy yntymaqtastyǵy men saýdany damytý arqyly biz adamdardyń erkin qozǵalysyna, shekaradaǵy ózge de problemalardy sheshýge yqpal etip, esirtkiniń zańsyz ainalymy men kontrabandaǵa tosqaýyl qoiǵymyz keledi. Búgingi qaqtyǵystyń bir qyry osyǵan kelip tireledi», - dep túiindedi Piter Býrian.
