Sársenbi kúni Eýropalyq Keńes prezidenti Sharl Mishel EO elderiniń memleket jáne úkimet basshylaryna búgin bastalatyn eki kúndik sammitke qatysýǵa resmi shaqyrtý hattaryn jiberdi, dep habarlaidy "Ult aqparat".
«Sizderdi BUU Bas hatshysy Antoniý Gýterreshpen jahandyq syn-qaterler men geosaiasi máseleler boiynsha pikir almasýdan bastalatyn Eýropalyq Keńesimizdiń otyrysyna shaqyrǵanyma qýanyshtymyn.
COVID-19 pandemiiasynan keiin qalpyna keltirý EO sheńberinde de, jahandyq deńgeide de mańyzdy taqyryp bolady. EO boiynsha qarqyndy júrip jatqan vaktsinatsiia naýqany jáne tsifrlyq COVID-19 sertifikatynyń iske qosylýy jaz ailarynda jáne odan keiingi ýaqytta erkin júrýdi jeńildetedi», - delingen qujatta.
Alaida, Sh. Mishel «koronavirýs mýtatsiialarynyń nusqalaryn muqiiat qadaǵalap, olardyń taralýyn toqtatýdy úilesimdi túrde júrgizý kerek» dep eskertti.
«2021 jyldyń aqpan aiynda kelisilgendei, biz aldaǵy daǵdarystarǵa jaqsy daiyndalý úshin pandemiiadan osy ýaqytqa deiin alǵan alǵashqy sabaqtarmen bólisemiz. Biz EO eksport pen qaiyrymdylyq arqyly búkil álem boiynsha vaktsinatsiia jumystaryn qalai jalǵastyra alatynyn, sondai-aq vaktsinalardyń álemdik jetkizilimin qalai arttyra alatyndyǵyn talqylaimyz», - dedi Eýropalyq Keńestiń basshysy.
Eýroodaq sammitiniń basqa taqyryptarynyń qatarynda kóshi-qon, halyqaralyq máseleler blogy bolady.
Budan basqa, kezdesýge qatysýshylar EO-nyń ekonomikalyq jandanýyn talqylaidy, atap aitqanda, «Next Generation EU» (EO-nyń kelesi býyny) qalpyna keltirý baǵdarlamasyn qorytyndylaidy, pandemiiadan keiin EO elderiniń tolyq jáne inkliýzivti ekonomikalyq jaǵdaiyna baǵyttalǵan qalpyna keltirý men turaqtylyqtyń ulttyq josparlaryn kelisedi.
