Qazaqstan men Eýropalyq odaq arasyndaǵy yntymaqtastyq máselelerin talqylaý úshin QR Prezidentiniń Halyqaralyq yntymaqtastyq boiynsha Arnaiy ókili Erjan Qazyhan Briýsselge jumys saparmen bardy, dep habarlaidy "Ult aqparat".
Onyń aiasynda E. Qazyhan Eýropalyq keńestiń, Eýropalyq komissiianyń, Eýropalyq parlamenttiń, Eýropalyq syrtqy is-qimyl qyzmetiniń joǵary ókilderimen, sondai-aq Eýropalyq investitsiialyq bank basshylyǵymen kezdesýler ótkizdi.
E. Qazyhan Eýropalyq keńestiń basshysy Sharl Mishelge Prezident Qasym-Jomart Toqaevtyń Arnaiy joldaýyn jetkizdi. Taraptar Qazaqstan men Eýroodaq arasyndaǵy Keńeitilgen áriptestik pen yntymaqtastyq týraly kelisimdi júzege asyrýdyń aǵymdaǵy jai-kúii men aldaǵy perspektivalaryn talqylady. Arnaiy ókil Eýroodaqpen tiimdi jáne jan-jaqty yntymaqtastyqty damytý Qazaqstannyń syrtqy saiasatynyń strategiialyq basymdyǵy bolyp tabylatynyn atap ótti. Joǵary jáne asa joǵary deńgeidegi saiasi dialogty qoldaý týraly kelisimge qol jetkizildi. Osy turǵyda taraptar Memleket basshysynyń Briýsselge saparyn uiymdastyrý máselesin talqylady.
«Eýropalyq seriktester Qazaqstannyń koronavirýsqa qarsy otandyq «QazVac» vaktsinasyn shyǵarý jáne qoldaný salasyndaǵy jetistigin joǵary baǵalady. Eýropalyq dárilik preparattar jónindegi agenttik maquldaǵan jaǵdaida, qazaqstandyq vaktsina pandemiiamen kúreste sheteldik seriktesterdi qoldaýdyń Eýropalyq tetigi, «Team Europe» jelisi boiynsha Qazaqstan men Eýroodaq arasyndaǵy yntymaqtastyqtyń taǵy bir mańyzdy negizine ainalýy múmkin», - delingen QR Syrtqy ister ministrliginiń málimetinde.
Kezdesýler barysynda taraptar halyqaralyq kún tártibindegi ózekti máselelerdi, sonyń ishinde jahandyq jáne óńirlik qaýipsizdik, Aýǵanstandaǵy jaǵdaidy turaqtandyrý máseleleri boiynsha pikir almasty.
Qazaqstan men Eýroodaqtyń saýda, investitsiialar, jasyl ekonomika jáne energetika máseleleri boiynsha yntymaqtastyǵy E. Qazyhannyń Eýrokomissiia basshylyǵymen kezdesýiniń negizgi taqyryby boldy. Taraptar Eýropalyq shikizat aliansy (European Raw Material Alliance) jáne Eýropalyq batareia aliansy (European Battery Alliance) sheńberindegi áriptestik máselelerin talqylady.
E. Qazyhan Eýropalyq parlament depýtattarynyń tobymen, sonyń ishinde Qazaqstan-Eýroodaq dostyq tobynyń múshelerimen jáne Ortalyq Aziia men Monǵoliia boiynsha Eýroparlament delegatsiiasymen kezdesýler ótkizdi.
Eýrodepýtattar Prezident Qasym-Jomart Toqaev bastamashy bolǵan saiasi reformalardyń áleýetin atap ótti. Parlamentshiler Memleket basshysynyń Adam quqyqtary salasyndaǵy birinshi kezektegi sharalar jospary týraly jarlyǵy jónindegi málimetti jyly qabyldady.
Arnaiy ókil Qazaqstan keń aýqymdy máseleler tizbegi boiynsha, onyń ishinde demokratiialandyrý, zań ústemdigi men adam quqyqtaryn qamtamasyz etý, azamattyq institýttardy damytý salasynda ashyq jáne syndarly dialogqa ázir ekenin atap ótti.
E. Qazyhan sondai-aq Eýropalyq investitsiialyq bank (EIB) basshylyǵymen kelissózder júrgizdi. Taraptar daǵdarystan keiingi kezeńde Qazaqstan men EIB arasyndaǵy ekonomikalyq yntymaqtastyqtyń perspektivalaryn talqylady. Shaǵyn jáne orta biznes salasyndaǵy yntymaqtastyq, aýyl sharýashylyǵy, tsifrlyq tehnologiialar, kólik jáne «jasyl» jobalardy damytý, sondai-aq Qazaqstan ekonomikasyn dekarbonizatsiialaý jáne 2060 jylǵa qarai kómirtegi beitaraptyǵyna qol jetkizý jónindegi josparlarǵa erekshe kóńil bólindi.
