Sýret: dw.com
Resei armiiasy Ýkraina aýmaǵyna basyp kirgen soń, Eýropa elderi Kremlge sanktsiia salyp, Reseige taýar jetkizýdi toqtatty. Alaida Resei postsovet elderi arqyly reeksport jasap otyr. Bul týraly Euromonitor International zertteý kompaniiasynyń baiandamasyna súiengen RBK habarlady, dep jazady Azattyq.
Eýropa statistikasyna sáikes, 2022 jylǵy naýryz ben qarasha aralyǵynda EO elderiniń Reseige eksporty 2021 jylmen salystyrǵanda 47 paiyz tómendep, 36,3 mlrd eýro bolǵan. Esesine byltyr Eýropa taýarlarynyń Armeniia, Belarýs, Qazaqstan, Grýziia, Ózbekstan jáne Qyrǵyzstanǵa eksporty 48 paiyz artyp, 20,3 mlrd eýroǵa jetken.
Burynǵy sovet elderine byltyr kóp taýar eksporttaǵan memleketterdiń aldyńǵy qatarynda Kipr, Grekiia, Liýksembýrg, Estoniia, Litva, Chehiia jáne Rýmyniia tur. Baiandama avtorlarynyń aitýynsha, naýryz ben qarasha aralyǵynda bul elderge taýar tasymaldaý kólemi 100 paiyzdan 550 paiyzǵa deiin ósken.
Euromonitor International málimetine qaraǵanda, Reseige ai saiyn úshinshi bir memleket arqyly quny 2,7-2,8 mlrd eýro bolatyn Eýropada óndirilgen taýarlar keledi.
Málimetterge súiengen Euromonitor International sarapshylary "Eýroodaq sanktsiiasy oidaǵydai áser etip jatqan joq, al Eýropa elderiniń kóbinde taýar eksportyn baqylaýda máseleler bar" degen qorytyndyǵa kelgen.
Buǵan deiin Eýropa odaǵy Reseidiń qarjy, energetika sektoryna baǵyttalǵan ekonomikalyq sanktsiiasynyń merzimin 2023 jyldyń 31 shildesine deiin uzartqan. Qazirgi kezde mundai sharalar saýda-sattyq, ártúrli maqsatta qoldanylýy múmkin tehnologiia men taýar, ónerkásip, kólik salalaryndaǵy túrli shekteýdi qamtidy.
Resei Ýkrainaǵa basyp kirgennen keiin Eýroodaq Máskeýge barlyǵy toǵyz sanktsiia paketin engizgen. Sanktsiia tiziminde 1300 jeke tulǵa men 120 zańdy tulǵa bar.
Qazir EO Reseige qarsy onynshy sanktsiia paketin ázirlep jatyr. Reuters málimetinshe, onda Reseidiń iadro sektory, atap aitqanda, "Rosatomǵa" qatysty shekteý qarastyrylǵan.
