Germaniianyń burynǵy qorǵanys ministri Ýrsýla fon der Liaien Eýrokomissiianyń jańa basshysy bolyp sailandy. Mundai sheshim 16 shildedegi Eýroparlament otyrysynda qabyldandy. Fon der Liaien Eýrokomissiiany basqaratyn alǵashqy áiel bolmaq.
Eýropa halyqtyq partiiasy usynǵan Ýrsýla fon der Liaienniń kandidatýrasyn 383 depýtat qoldap daýys bergen. Tiisti mejeden ótý úshin ol keminde 374 daýys jinaý kerek bolǵan. 327 depýtat qarsy daýys berip, 22 depýtat qalys qalǵan.
Daýys berý aldynda sóilegen sózinde Ýrsýla fon der Liaien sailanyp jatsa Eýrokomissiiadaǵy genderlik balanstyń saqtalýyna nazar aýdaratynyn aityp, Brekzit ýaqytynyń uzarýy múmkindigi jaily sóz qozǵaǵan.
Sarapshylar fon der Liaienge bergen daýystyń asa kóp emes ekenin aitady. Máselen, onyń aldynda bul qyzmetti atqarǵan Jan-Klod Iýnker 2014 jyly 422 daýys jinaǵan. Kei sarapshylar fon der Liaien Eýroodaqtyń biýrokratiialyq mashinasyn basqarýda birqatar qiyndyqtarmen kezdesetini sózsiz dep otyr.
Ýrsýla fon der Liaien bul qyzmetike biyl qarasha aiynda kirisip, aldaǵy bes jyl boiy basqaratyn bolady.
