Eýropalyq Komissiia Ýkrainadan kelgen bosqyndardy óz aýmaǵynda qabyldaý úshin Eýroodaqqa múshe memleketterge 3,5 milliard eýrodan astam avans tóledi, dep habarlaidy QazAqparat.
Biriktirý saiasaty jáne reformalar jónindegi eýrokomissar Eliza Ferreira: «Eýropalyq Odaq Ýkrainamen, sondai-aq bizdiń múshe-memlekettermen bosqyndardy qabyldaý úshin yntymaqtasady. Búgin biz yntymaqtastyǵymyzdyń taǵy bir naqty nátijesin kórip otyrmyz. Ol – birigý qoryn eń qajet baǵytqa jumyldyrý», – dep málimdedi.
Eýropalyq Odaqtyń jumyspen qamtý jáne áleýmettik quqyqtar jónindegi komissary Nikolas Shmit: «Ýkrainadan qashqan adamdar qaýipsiz ómirin qalpyna keltirý úshin dereý qoldaýdy qajet etedi. Osy avans arqyly odaqqa múshe memleketter muqtaj jandarǵa azyq-túlik, baspana, densaýlyq saqtaý, bilim salalarynda, jumysqa turýda kómek jáne taǵy basqalaryn usyna alady», – dedi.
Eýrokomissiianyń baspasóz qyzmeti 2022 jyldyń 24 aqpanynan keiin Eýrokomissiia Ýkrainadan shyqqan beibit turǵyndardy qoldaýǵa jáne EO-ǵa múshe memleketterge olardy qabyldaýǵa jáne kómek kórsetýge búkil kúsh-jigerin jumyldyrǵanyn habarlady.
Atap aitqanda, Eýrokomissiia 2014-2020 jyldarǵa arnalǵan baǵdarlamalar sheńberinde biriktirý saiasatynan qolda bar resýrstardy ikemdi jumyldyrý, sondai-aq 100% qosa qarjylandyrý jáne «REACT-EU» baǵdarlamasy sheńberinde qarjylandyrýdy 3,5 mlrd eýroǵa ulǵaitý múmkindigin engizdi.
Eýrokomissiia jarnasy EO-ǵa múshe memleketterdiń memlekettik biýdjetine túsetin qosymsha júktemeni jeńildetedi.
