Ortalyq Aziianyń gúldenýi Eýropa úshin mańyzdy. Bul týraly «Eýropalyq Odaq – Ortalyq Aziia» ekonomikalyq forýmynda Eýropalyq komissiianyń tóraǵasy Ýrsýla fon der Liaien aitty, dep habarlaidy QazAqparat.
«Táýelsizdik alǵannan bergi 30 jyl ishinde Ortalyq Aziia elderiniń ekonomikasy turaqty negizde ósip keldi. Alaida KVI pandemiiasy barshamyzǵa birshama kedergi keltirgeni anyq. Bizdiń yntymaqtastyq ekonomikalarymyzdyń ilgerileýin qaita jandandyra alady. Osy baǵyttaǵy qadamdar uzaq merzimdi perspektivada Ortalyq Aziia elderiniń ekonomikasyn qýatty, turaqty ete alady. Biz Eýropada da osy baǵytta umtylys jasap kelemiz. Osy oraida ekonomikamyzdy ózgertý úshin qalpyna keltirý josparymyzǵa qomaqty qarajatty salyp jatyrmyz. Sonymen qatar, taza energetikaǵa kóshýdi jyldamdatyp kelemiz. Tsifrlyq infraqurylymǵa mamandar men kompaniialardy kóptep jumyldyryp jatyrmyz», - dedi Ýrsýla fon der Liaien.
Ol búgingi forýmda ekologiialyq qalpyna keltirý, tsifrlandyrý, qolaily iskerlik klimat sekildi úsh negizgi pýnktige ekpin qoiylyp otyrǵanyn eske saldy.
«Osy salalarda Ortalyq Aziiadaǵy elderge tyǵyz yntymaqtastyqty usynyp otyrmyz. Bul baǵyttaǵy máselelerdi sheshýge barshamyz múddelimiz. Klimattyń ózgerýi Ortalyq Aziiaǵa óz yqpalyn tigizip jatyr. Biyl bolǵan qurǵaqshylyq egis alqaptaryna, janýarlarǵa zalal keltirip, sý qoimalaryn qurǵatty. Degenmen Ortalyq Aziia jańartylǵan energiia kózderiniń osyǵan deiin paidalanylmai kelgen eleýli áleýetine ie. Investitsiialar durys baǵytta júrgizilse, onda osy óńirdiń kómir men ózge de otyn túrlerine degen táýeldiligi tómendei túsedi. Osy oraida joǵary sapaly jumys oryndary qurylyp, aýany tazartýǵa jol ashylady», - dedi ol.
Bul rette ol EO men Ortalyq Aziia óńirin birlese jumys isteýge shaqyrdy.
«Ortalyq Aziianyń gúldenýi Eýropa úshin mańyzdy. Bizdiń seriktestik óńir halyqtary úshin shyn máninde mańyzǵa ie bola alady», - dedi Ýrsýla fon der Liaien.
