Sankt-Peterbýrgte III Eýraziialyq áielder forýmy jumysyn bastady. 110 elden kelgen delegattar qatysatyn aýqymdy is-shara tórt jylda bir ret ótkiziledi, dep habarlaidy QazAqparat Áielder isteri jáne otbasylyq-demografiialyq saiasat jónindegi ulttyq komissiianyń baspasóz qyzmetine silteme jasap.
Dialog alańdarynda áielderdiń saiasat pen biznestegi kóshbasshylyǵy, jańa tehnologiialar men innovatsiialardy damytý, ekologiia, densaýlyq saqtaý, mádeniet jáne sport, eriktiler qozǵalysy jáne basqa da salalardaǵy máseleleri talqylanady.
Forýmnyń mańyzdy is – sharalarynyń ishinde - «Áielder jiyrmasynyń» kóshpeli otyrysy, ónerkásiptik damý boiynsha BUU sessiiasy, Dúniejúzilik bank, BRIKS elderiniń Isker áielder aliansy bar. Forým jumysyna qazaqstandyq delegatsiia qatysýda.
Forýmnyń ashylýy - plenarlyq otyrysynda Resei Federatsiiasynyń Prezidenti Vladimir Pýtinniń qatysýymen Qazaqstan Respýblikasy Prezidentiniń janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń tóraiymy Lazzat Ramazanova sóz sóiledi. Ol halyqaralyq is-sharaǵa qatysýshylardy áielderdiń ómir súrý sapasyn arttyrýǵa jáne quqyqtary men múmkindikterin keńeitýge baǵyttalǵan elimizde júrgizilip jatqan reformalarmen tanystyrdy.
«Búginde álem elderi jahandyq jáne óńirlik syn-tegeýrinderden týyndaǵan jalpy problemalar men kedergilerge tap bolýda. Olardy eńserýge Eýraziialyq genderlik aǵartý ortalyǵyn qurý yqpal etetin bolady, ol úshin biz áielderdiń quqyqtary men múmkindikterin keńeitý salasynda ozyq tájiribemen almasý úshin Almatyda qurylatyn Ortalyq Aziia óńirlik bilim ortalyǵynyń alańyn usynýǵa daiynbyz. Ortalyqtyń negizinde biz elaralyq genderlik zertteýler institýtyn qurýdy usynamyz. Onyń missiiasy jańa ekonomikalyq, áleýmettik, ekologiialyq syn-tegeýrinder men táýekelderdiń genderlik damý deńgeiine áserin barynsha azaitý boiynsha ulttyq úkimetterge arnalǵan usynymdardy boljaý, baǵalaý jáne ázirleý bolyp tabylady», - dep usyndy Lazzat Ramazanova.
Aýǵanstandaǵy jaǵdaiǵa alańdaýshylyqty eskere otyryp, beibitshilik pen qaýipsizdikti qamtamasyz etýde áielderdiń kúsh-jigerin biriktirý usynyldy.
Forým aiasynda BUU-áielder uiymdastyrǵan «Áielder kásipkerligi aqyldy ekonomikanyń negizi retinde: turaqty jáne teń sheshim» paneldik sessiiasynda sóz sóilegen Lazzat Ramazanova áielderdiń memleketterdiń ekonomikalyq ósýindegi basty rólin atap ótti.
«Pandemiiadan týyndaǵan jahandyq daǵdarysqa qaramastan, memleket qabyldaǵan keshendi sharalardyń arqasynda qazaqstandyq áielderdiń ekonomikalyq belsendiliginiń ósýi baiqalady. Elimizdiń árbir óńirinde áielder kásipkerligin qoldaý jónindegi resýrstyq ortalyqtar qurylýda. Memlekettik baǵdarlamalar arqyly áielderdiń jumyspen qamtylýyna kómek kórsetiledi», - dep atap ótti Lazzat Ramazanova.
Parlament Senatynyń depýtaty, Ulttyq komissiia tóraǵasynyń orynbasary Lázzat Súleimen Memleket basshysy bastamashylyq etken parlamenttik reformalar, «Beibitshilik pen senim diplomatiiasyn damytýdaǵy áielder missiiasy» parlamentaralyq dialogynda jergilikti ókildi organdardaǵy áielderdiń ókildigi týraly sóz sóiledi.
Forým barysynda BUU-Áielder Eýropa jáne Ortalyq Aziia boiynsha Óńirlik keńsesiniń basshysy A.El-Iasirmen ekijaqty kezdesý ótkizilip, onda áielderdiń quqyqtary men múmkindikterin keńeitý jónindegi is-qimyl josparyn ázirleý jáne iske asyrýdaǵy yntymaqtastyqtyń strategiialyq máseleleri talqylandy.
