Áleýmettik jeliler men messendjerlerde EUÝ-diń oqytýshysy atynan bir xabarlama tarap júr. Onda 75 upaidan artyq jinaǵan túlekterdiń eki mamandyq boiynsha grantqa iligetini týraly aitylǵan, dep xabarlaidy QazAqparat tilshisi.
"Qurmetti mektep bitirýshi túlekter! Biyl UBT tapsyrǵan talapkerler! L.N.Gýmilev atyndaǵy Eýraziia Ulttyq Ýniversitetinde (ENÝ) biylǵy 2018-2019 oqý jylynda "Mektepke deiingi oqytý jáne tárbieleý", "Bastaýysh mektepte oqytýdyń ádistemesi" mamandyqtary ashyldy. Jańadan ashylǵan mamandyqqa UBT-da 75 balldan joǵary jinaǵan mektep túlekterin GRANTqa qabyldaidy. Biyl grant kóp bólingen, basqa mamandyqqa grantqa túspei qalǵandardy nemese taǵy ózge jaǵdailar bolsa, 8,9,10 tamyz kúnderi qujat qabyldaidy. Ulttyq ýniversitet! Qazaqstandaǵy #1, reitingi eń joǵary bilim ordasy. (tel.) Jumabekova Fatima Niiazbekqyzy", - delingen xabarlamada.
EUÝ-dyń kásiptik baǵdar berý jáne testileý ortalyǵynyń bastyǵy Maqsat Aralxanovtyń aitýynsha, jelide taraǵan xabarlamada birqatar málimetter shyndyqqa janaspaidy.
"Áleýmettik jelilerde Eýraziia ulttyq ýniversitetiniń oqytýshysy Jumabekova Fatima Niiazbekqyzynyń taratqan aqparaty týraly qazir xalyq arasynda kóp áńgime bolyp jatyr. Bul kisi Eýraziia ulttyq ýniversitetine talapkerlerdi kóbirek tartýdy kózdegen shyǵar. Biraq ondai aqparatty naqtyraq jáne dál berý kerek edi. Aqparattyń ishinde birneshe sáikespeýshilik bar. Máselen, ol adam eki mamandyq - "Mektepke deiingi oqytý jáne tárbieleý" men "Bastaýysh mektepte oqytýdyń ádistemesin" kórsetken. Eýraziia ulttyq ýniversitetinde "Mektepke deiingi oqytý jáne tárbieleý" bar. Oǵan litsenziiany da alǵanbyz. Al "Bastaýysh mektepte oqytýdyń ádistemesi" boiynsha maman daiyndamaimyz. Bul málimet sáikes kelmeidi. Qazir talapkerlerdiń kóbisi osy mamandyqty surap, jii xabarlasady" - dedi M.Aralxanov QazAqparat tilshisine bergen suxbatynda.
Onyń aitýynsha, "basqa mamandyqqa grantqa túspei qalǵandardyń qujatyn qabyldaidy" degen aqparat ta shyndyqqa janaspaidy. Sebebi atalǵan eki mamandyqtyń beiindik pánderi - biologiia men geografiia. Sondyqtan matematika, fizika jáne basqa da pánder boiynsha test tapsyrǵandar qujat bere almaidy.
"Al grant máselesine kelsek, ol kisiniń aitaiyn degeni - ákimdikterdiń memlekettik granttarǵa qosa óz esebinen qosymsha tapsyrys berýi. Iá, Astana qalasynyń ákimdigi "Mektepke deiingi oqytý jáne tárbieleý" men "Bastaýysh mektepte oqytýdyń ádistemesi" boiynsha qosymsha granttar bólip berdi. Biraq ol granttar tek Eýraziia ulttyq ýniversitetine ǵana berilgen joq. Dál sondai mamandyqtary bar basqa da joǵary oqý oryndaryna da bólindi. Arnaiy komissiia bar. Sol komissiia talapkerlerdiń ótinishterin qarap, granttardy taǵaiyndaidy. Biraq "75 balldan joǵary jinaǵandardyń barlyǵy túse alady" degen aqparat ta sáikes kelmeidi. Óitkeni ákimdiktiń granttary da konkýrs arqyly beriledi", - dep atap kórsetti M.Aralxanov.
