Qazaqstan Respýblikasynyń Tuńǵysh Prezidenti Nursultan Nazarbaev «Bir beldeý, bir jol» halyqaralyq yntymaqtastyq jónindegi joǵary deńgeidegi 2-shi forýmynyń ashylýynda Qazaqstannyń tranzittik-kóliktik áleýeti týraly aitty, dep habarlaidy QazAqparat tilshisi.
Elbasy «Bir beldeý, bir jol» bastamasy jetistikteriniń biri - geografiia men teńsizdik syn-tegeýrinderin oraǵytý ekenin atady.
«Eýraziia qaita birigip jatyr. Eki myń jyl burynǵydai qurlyǵymyzdyń shalǵai jatqan túrli bólikteri bir arnaǵa toǵysty. Qysqa ýaqyttyń ishinde kúrdeli tabiǵi landshaftar men geosaiasi qarama-qaishylyqtardy bastan ótkerip, birlesip ekonomikalyq dáliz qura bildik. Zamanaýi logistikanyń, memleketterdiń ózara túsinistiginiń arqasynda Ońtústik-Shyǵys Aziiadaǵy taýarlar Soltústik Eýropa qalalaryna bar bolǵany 2 aptanyń ishinde jetip jatyr. Bunyń negizinde pragmatizm, órkendeýge umtylý jatyr», - dedi N.Nazarbaev.
Nursultan Nazarbaev Qazaqstannyń Eýraziianyń dál ortasynda tiimdi ornalasqanyn eske saldy. Bizdiń memleketimiz arqyly Aziia men Eýropa qysqa jolmen bailanysyp jatyr.
«Qolda bar tranzittik áleýetti júzege asyrý maqsatynda «Nurly jol» ulttyq baǵdarlamamyzdy «Bir beldeý, bir jol» bastamasymen implementatsiialadyq. Sońǵy 10 jylda Qazaqstan 30 mlrd AQSh dollary kólemindegi qarajatty infraqurylymdy, kóliktik-logistikalyq aktivter men quzyretterdi damytýǵa investitsiialady. 3 myń shaqyrym temir joldy, 12,5 myń shaqyrym avtomobil joldaryn paidalanýǵa berdik nemese jóndeýden ótkizdik. Otandyq teńiz jáne áýe ailaqtary qaita quryldy. Elimizde qysqa ýaqyt ishinde zamanaýi básekege qabiletti tranzittik hab quryldy. Bul joldardyń barlyǵy biz arqyly, Ortalyq Aziia arqyly, bizdiń kórshilerimiz arqyly basqa elderge ótip jatyr», - dedi Elbasy.
N.Nazarbaev 2016 jyldan bastap «Nurly jol» baǵdarlamasy «Jibek joly ekonomikalyq beldeýimen» túiindesip, tabysty júzege asyrylyp jatqanyn eske saldy.
«Eýropany Qytaimen Resei jáne Qazaqstan arqyly ótetin «Batys Eýropa – Batys Qytai» joǵary sapaly qurlyqaralyq avtomagistrali jalǵap jatyr. Bizdiń elimiz Qytaidyń Tynyq muhityndaǵy Lianiýngan ailaǵynda logistikalyq terminal saldy. «Qazaqstan - Túrikmenstan - Iran – Parsy shyǵanaǵy» temir joly qaita iske qosyldy», - dedi ol.
Sondai-aq, Elbasy «Bir beldeý bir jol» qazaqstandyq G-Global ideiasymen úndes ekenin aitty.
«Qytai Tóraǵasy Si Tszinpin myrzanyń «Bir beldeý, bir jol» qurylysy arqyly bizdi adamzattyń ortaq taǵdyry qoǵamdastyǵyn birge qurýǵa shaqyrýy oǵan degen tereń qurmetimdi oiatady. Munyń máni tereńde jatyr. Álemdik saiasatkerdiń osynaý jańa paiymy barlyq elderdiń múddesin shoǵyrlandyrýǵa negizdelgen G-Global ideiamyzben úndes», - dedi Nazarbaev.
