4 jeltoqsanda Odaqtas elder úkimet basshylarynyń qatysýymen Eýraziialyq úkimetaralyq keńestiń otyrysy beinekonferentsiia rejiminde ótedi. Bul týraly Eýraziialyq ekonomikalyq komissiia alqasy tóraǵasynyń kómekshisi Iia Malkina onlain brifingide aitty, dep habarlaidy QazAqparat.
Otyrys barysynda toǵyz másele qaralady. Atap aitqanda, tehnikalyq retteý ministri Viktor Nazarenko túzetýler, tehnikalyq reglamentter, tamaq ónimderiniń qaýipsizdigi jáne oǵan qatysty qujattar jiyntyǵy týraly esep beredi.
«Básekelestik jáne monopoliiaǵa qarsy retteý ministri Arman Shakkaliev Úkimet basshylaryna biyl 17 shilde kúni úkimetaralyq keńeste komissiia bergen tapsyrmalaryn oryndaýy týraly esep beredi. Iaǵni, memlekettik satyp alý maqsatynda taýarlardyń jekelegen túrleriniń shyqqan elin anyqtaý erejeleri boiynsha jumys barysy týraly. Bolashaqta bul Odaq elderiniń memlekettik satyp alýlaryna qoljetimdi bolatyn ónerkásiptik taýarlardyń eýraziialyq tizilimin qalyptastyrýǵa yqpal etedi», - deidi Eýraziialyq ekonomikalyq komissiia alqasy tóraǵasynyń kómekshisi Iia Malkina.
Onyń aitýynsha, Eýraziialyq úkimetaralyq keńestiń otyrysynda qara jáne tústi metall qaldyqtaryn Qazaqstan aýmaǵynan Odaq quramyndaǵy basqa elderge temirjol quraly arqyly shyǵarý máselesi qaralady.
«Eske sala keteiik, Qazaqstan Respýblikasy osy másele boiynsha Eýraziialyq ekonomikalyq komissiia alqasynyń sheshimine shaǵymdaný quqyǵyn paidalandy», - deidi ol.
