Qazaqstanda etnosaralyq qatynas salasynda jańa memlekettik saiasat qurý kerek. Bul týraly QR Prezidenti Ákimshiligi Basshysynyń birinshi orynbasary Máýlen Áshimbaev aityp berdi, dep habarlaidy QazAqparat.
«Elimizdiń kópetnosty bolýy - bizdiń artyqshylyǵymyz jáne eldiń damýyna yqpal etetin strategiialyq resýrs. Bul – bizdiń álsizdigimiz emes, áli kúnge deiin barynsha qoldana almai kele jatqan múmkindigimiz. Sondyqtan memleket, memlekettik organdar jáne Prezident Ákimshiligi Qazaqstanda turatyn barlyq etnikalyq toptardyń damýyna, olardyń máselelerin sheshýge qoldaý kórsetedi», - dedi M.Áshimbaev elordada etnosaiasattyń ózekti máseleleri týraly dóńgelek ústelde.
Onyń aitýynsha, Prezident Qasym-Jomart Toqaevtyń qazaq tiliniń ýaqyt óte kele elimizdegi ultaralyq qatynas tiline ainalýy qajettigi týraly tujyrymdamalyq ideiasynyń keleshegi zor. Bul – óte mańyzdy tezis.
«Etnosaralyq qatynas salasyndaǵy memlekettik saiasatqa óte mańyzdy ózgerister qajet. Osy salada jumys isteitin memlekettik organdaryń, qoǵamdyq institýttardyń jumysyn tekserý kerek. Taldaý men tekserý nátijeleri boiynsha aldaǵy kezeńde etnosaralyq qatynas salasynda jańa memlekettik saiasat qurý kerek», - dedi Máýlen Áshimbaev.
Buǵan deiin Máýlen Áshimbaev Qordai aýdanynda bolǵan qaiǵyly oqiǵa jóninde pikir bildirgen edi. Sondai-aq, Qazaqstanda azamattardy tiline, dinine nemese áleýmettik jaǵdaiyna bailanysty kemsitýge jol berilmeitinin málimdedi.
