QR Bas memlekettik sanitar dárigeri Aijan Esmaǵambetova jumys berýshilerge PTR testileý nátijesin aparý talaby týraly aitty, dep habarlaidy "Ult aqparat".
«Qazir kóptegen jumys berýshiler keńsege oralǵan qyzmetkerlerden PTR anyqtamasyn surap jatyr. Biz mundai talapty mindettegen joqpyz, mindettemeimiz. Tipti, keńes bermeimiz dep aita alamyn. Óitkeni, PTR anyqtamasy búgin teris bolýy múmkin, biraq adamnyń ózi virýs juqtyryp, endi tarala bastaýy ábden múmkin», - dedi bas sanitarlyq dáriger onlain brifingte.
Onyń aitýynsha, jumys berýshilerdiń talaby eńbek zańnamasy aiasynda qarastyrylady.
«Eger jumys berýshi men jumysshy arasynda testileýden ótý týraly ýaǵdalastyq bolsa, bul eńbek zańnamasy aiasynda sheshilýi kerek. Biraq, biz jumysqa oralǵandarǵa mindetti testileýden ótý talabyn qoiyp otyrǵan joqpyz», - dedi A. Esmaǵambetova.
Sonymen birge, spiker PTR testileýden tegin ótetinder sanatyn aityp berdi.
«Aýrý oqiǵasy tirkelgen jerde únemi epidemiologiialyq tekserý jumystary júrgiziledi. Tekserý aiasynda bailanysta bolǵandar tizimi qurylady. Meniń qaýlyma sáikes, jaqyn jáne yqimal bailanysta bolǵan adamdar testileýden tegin ótýi tiis», - dedi A. Esmaǵambetova.
