Almaty oblysynda politsiia esirtkini zańsyz óndirýdiń tolyq tsiklin júzege asyrǵan qylmystyq toptyń qyzmetin toqtatty. Arnaiy operatsiia barysynda avtomattandyrylǵan jasyryn fitozerthana anyqtalyp, ondaǵan keli daiyn esirtki, qarý-jaraq pen iri kólemdegi qarajat tárkilendi, dep habarlaidy ult.kz.
IIM-niń málimetinshe, arnaiy is-shara «Qarasora – 2026» jedel-profilaktikalyq operatsiiasy aiasynda júrgizilgen. Qylmystyq top quramynda esirtki ósirýden bastap, ony VIP-sanattaǵy klientterge ótkizýge deiingi barlyq kezeń uiymdastyrylǵan.
IIM Esirtki qylmysyna qarsy is-qimyl komitetiniń basqarma bastyǵy Baqytjan Ámirhanovtyń aitýynsha, joiylǵan fitozerthana zamanaýi avtomattandyrylǵan jeldetý júiesimen, temperatýra, jaryq jáne sýarýdy baqylaityn arnaiy datchiktermen jabdyqtalǵan. Munda jyl boiy quramynda esirtkisi bar joǵary kontsentratsiialy qarasora suryptary ósirilip kelgen.
Jasyryn kireberisi bar jertóleni tintý kezinde 29 túp qarasora, 27 keli daiyn ónim, esirtki ósirýge arnalǵan arnaiy jabdyqtar, elektrondyq aqparat tasymaldaǵyshtar, bailanys quraldary, qylmystyq jolmen alynǵan 3 million teńge jáne tirkelmegen atys qarýy men oq-dáriler tárkilendi.
Tergeý barysynda zerthanany uiymdastyrǵan 40 jastaǵy er adamnyń kannabis ósirý tehnologiiasyn uzaq ýaqyt zerttep, arnaiy shetelge baryp tájiribe jinaǵany anyqtaldy. Ol elitalyq suryptardy ósirýge arnalǵan jabdyqtarǵa tapsyrys berip, kannabisti joǵary kontsentratsiialy ekstraktilerge, sonyń ishinde gashish maiyna ainaldyrý tásilderin meńgergen.
Jedel-izdestirý sharalary nátijesinde onyń buryn asa aýyr qylmystary úshin birneshe ret sottalǵan 45 jastaǵy sybailasy da qolǵa tústi. Kúdiktiniń garajynan 4 keli gashish, býyp-túiilgen esirtki ónimderi, zip-paketter men esirtki qoldanýǵa arnalǵan quraldar tárkilendi.
Qazirgi ýaqytta quqyq qorǵaý organdary qylmystyq toptyń ózge múshelerin, tuqym men arnaiy jabdyqtardy jetkizý arnalaryn jáne zańsyz shemanyń basqa da qatysýshylaryn anyqtaý baǵytynda tergeý júrgizip jatyr. Ustalǵandar ýaqytsha ustaý izoliatoryna qamaldy. Sonymen qatar, olardyń qylmystyq jolmen alynǵan jyljymaityn múlki men qymbat avtokólikterine tyiym salyndy.
