Kórneki foto: Polisia.kz
Ótken jyly sintetikalyq esirtkini taratqany úshin 40-tan astam jasóspirim jáne kámeletke tolmaǵandar ustaldy. Bul týraly IIM Esirtki qylmysyna qarsy is-qimyl departamenti bastyǵynyń orynbasary Baqytjan Ámirhanov aitty, dep habarlaidy Kazinform agenttigi.
«Qazir biz virtýaldyq keńistikpen jáne qashyqtyqta qarym-qatynas jasaýmen tyǵyz bailanysty ózindik jastar sýbektivtik mádenietimen betpe-bet keldik. Esirtki zattaryn satýda internet-dúkenderdiń ieleri de osy jaǵdaidy paidalanady. Esirtki biznesine tartylatyn jasóspirimder sany kóbeiip keledi. Mundaǵy jaǵdai kóńil kónshitpeidi jáne ókinishke qarai teris úrdiske ákep soqtyrady. Tek ótken jyly sintetikalyq esirtkini taratqany úshin 40-tan astam jasóspirim jáne kámeletke tolmaǵandar ustaldy. Osy aidyń ózinde 4 kámeletke tolmaǵan bala qolǵa tústi. Kúni keshe ǵana jedel-izdestirý is-sharalaryn ótkizý barysynda Aqtóbe qalasynda orta mekteptiń 9 synyp oqýshysy ustaldy. Tintý júrgizý kezinde keýdeshesiniń qaltasynda jalpy kólemi 48 dana túiinshek tabyldy», - dedi ol IIM baspasóz qyzmeti alańynda ótken brifingide.
Onyń atap ótýinshe, elimizde esirtkini satqany úshin 14 jasynan bastap qylmystyq jaýapkershilikke tartý kózdelgen jáne 10 jylǵa deiin bas bostandyǵynan aiyrý jazasy taǵaiyndalady.
«Mundai jaýapkershilik sharalaryn qabyldaý bárinen buryn osy balalardyń ata-analary, olardyń týysqandary men zańdy qorǵaýshylary tarapynan qoǵamdyq rezonans týǵyzatyny aitpasa da túsinikti. Biz olarmen tyǵyz bailanystamyz. Tipti Májilis depýtattarynyń qatysýymen Parlament qabyrǵasynda da kezdesýler ótkizemiz, áńgimelesemiz, keńester beremiz», - dedi Baqytjan Ámirhanov.
