Qazaqstanda esirtki ainalymy salasyndaǵy zań buzýshylyqtar úshin 35 dáriger jaýapkershilikke tartyldy, dep habarlaidy QazAqparat Polisia.kz saityna silteme jasap.
Biylǵy 29 qarasha men 3 jeltoqsan aralyǵynda respýblika boiynsha «Dármek» jedel-aldyn alý is-sharasynyń tórtinshi kezeńi ótkizildi. Negizgi maqsaty – esirtki quraldarynyń, psihotroptyq zattar men prekýrsorlardyń zańdy ainalymyndaǵy buzýshylyqtardy anyqtaý. Is-shara barysynda osy zattardy óz qyzmetinde paidalanatyn 75 kásiporyn men uiym tekserilgen.
Alty kún ishinde elimizde QR Qylmystyq kodeksiniń 303-baby (Esirtki, psihotroptyq nemese ýly zattarmen jumys isteý erejelerin buzý) boiynsha 12 qylmys anyqtaldy.
Nur-Sultan qalasynda, Aqmola jáne Shyǵys Qazaqstan oblystarynda quramynda esirtki quraldary bar preparattar ainalymy erejelerin buzýǵa jol bergen 3 meditsina qyzmetkerine qatysty qylmystyq ister qozǵaldy.
129 ákimshilik quqyq buzýshylyq tirkeldi:
– 5 zańsyz farmatsevtikalyq qyzmeti úshin (QR ÁQBtK 424-b.);
– 95 farmatsevtikalyq qyzmet erejelerin buzǵany úshin (QR ÁQBtK 426-b. 1-b.);
– 24 obektiniń tehnikalyq nyǵaitý talaptaryn buzǵany úshin;
– 5 litsenziialaý normalaryn buzǵany úshin (QR ÁQBtK-niń 464-b.).
«Ákimshilik jaýapkershilikke 129 adam tartyldy, onyń ishinde 32 meditsina qyzmetkeri. Barlyq materialdar Densaýlyq saqtaý ministrligi Meditsinalyq jáne farmatsevtikalyq baqylaý komitetiniń aýmaqtyq bólimshelerine berildi. Ainalymnan 356 esirtki ampýlasy, 5 258 tabletka, 173 psihotroptyq zattar ampýlasy, 258 prekýrsorlar ampýlasy alyndy», - delingen saitta.
Aqparatqa sáikes, quramynda esirtki zaty bar meditsinalyq preparattardy «qara naryqta» satý faktileri anyqtalýda. Iaǵni psihobelsendi áseri bar dárihanalyq preparattar jasóspirimderdiń qyzyǵýshylyǵyn týdyrady jáne olardyń esirtki tutynýyna tikelei sebepshi bolady.
Mysaly, Almaty oblysynyń turǵyny sintetikalyq apiyndarǵa jatatyn 20 tabletkamen ustaldy. Atyraý oblysynda osyndai eki fakti anyqtaldy. Barlyǵy 3 870 tabletka jáne atropin seriiasynyń 70 quty tamshylary tárkilendi.
Osyǵan uqsas fakti Temirtaý qalasynda anyqtaldy, onda dúkende dárihanalyq preparattyń 10 tabletkasyn satqan jergilikti turǵyn ustaldy. Mundai dári-dármekter adam ómiri men densaýlyǵyna ziiandy áser etetin kúshti zattardyń tizimine engizilgen. Ony ákelý jáne taratý jónindegi baqylaý fýnktsiialaryn densaýlyq saqtaý organdary júzege asyrady.
