Eńbekshiqazaq aýdanyna qarasty Esik qalasynda 4 jastaǵy qyzdy zorlaǵan er adam ustaldy. Almaty.tv telearnasy qylmystyń myn-jaiyn tarqatty, - dep habarlaidy Tengrinews.kz tilshisi.
Oblystyq politsiia qyzmetkerleriniń málimetinshe, kúdikti tanysynyń úiine qonaqqa barǵan. Ishimdikke sylqiia toiyp alyp, sol úidiń saraiynda aram piǵylyn iske asyrǵan. Shańyraǵymyzǵa shubar jylandy kirgizippiz degen shaǵymdanýshy tarap qaryndasyn zorlaǵan 43 jastaǵy kúdikti tanysym deidi. Qyzdy jylap jatqan jerinen arashalap alǵan aǵasynyń aitýynsha, shyńǵyrǵan daýsyn estip, saraiǵa entelep júgirip kelgen. Biraq ol kezde álgi qaskói óziniń aram piǵylyn iske asyryp úlgergen. Zábir kórgen balanyń jaǵdaiyn dárigerler ortasha dep baǵalady. Bala qatty qorqyp qalǵan.
"Ota bólmesinde balaǵa diagnostikalyq tekseris júrgizip, qan toqtattyq. Jynys múshesinen qan ketken. Anasynyń da, balanyń da jaǵdaiy jaqsy. Qazir balamen de, anasymen de psiholog jumys istep jatyr", - dedi Eńbekshiqazaq aýdany kópsalaly aýrýhana direktorynyń orynbasary Gúlmira Otynbekova.
Telearna málimetinshe, dúiim jurtty dúrliktirgen oqiǵany jergilikti politsiia sol kúni baqylaýǵa alyp, kýágerlerden jaýap alǵan.
"Kishkentai qyzdy zorlaý deregi 13 sáýirde Eńbekshiqazaq aýdanynda bolǵan. Asa aýyr qylmys jasaǵan er adam Qyzylorda aýdanynyń týmasy. Aldyn-ala málimet boiynsha ol qonaqqa kelip, qylmys jasaǵan kezde mas kúide bolǵan. Qazirgi tańda kúdikti qamaýǵa alynyp QR Qylmystyq kodeksiniń 120-baby boiynsha tergeý amaldary júrip jatyr", - dedi Politsiia departamentiniń baspasóz hatshysy Ábiltai Ábenov.
Al jábirlenýshi tarap, 4 jastaǵy qyzdy zorlaǵan kúdiktige eń aýyr jaza berýin talap etip otyr. Onyń ústine áleýmettik jelidegi bul iske qatysty taraǵan jalǵan aqparatqa senbeýin suraidy.
