14 maýsym kúni Almaty oblysy, Eńbekshiqazaq aýdanyndaǵy «Esik» memlekettik tarihi-mádeni qoryq-mýzeiinde «Saq alaýy» taqyrybymen «Mýzei túni» ótti. «Esik» qoryq-mýzeii dál osy kúni qonaqtardy erekshe, «túngi» formatta qarsy aldy. Arnaiy uiymdastyrylǵan merekelik baǵdarlama kóptegen jaǵymdy jáne tanymdy aqparattardy qamtydy.
Atap aitsaq, qoryq-mýzeidiń ekspozitsiialyq zaldaryna ekskýrsiia, «Altyn adamnyń qupiiasy» jastarǵa arnalǵan kvest-oiyn, balalarǵa arnalǵan «Tas betindegi óner» atty shyǵarmashylyq sabaqtar ótkizildi. Sondai-aq, ART balalar óner mektebi – mektep oqýshylarynyń kórmesi (Esik qalasy) qoiylyp, «Usta Dárkembai atyndaǵy qoldanbaly óner mýzeii» sheberleriniń jáne Eýraziialyq dizainerler odaǵynyń múshesi Kákei Qyrǵaýyldyń «Órmek toqý», sondai-aq, kózeshi Janbolat Nurdanbektiń sheberlik sabaǵyna da mýzei túnine kelýshiler kýá boldy. Odan bólek, «Dombyra-pati» – dombyrashylardyń óneri, zamanaýi sheberlerdiń qoldanbaly óner týyndylarynyń kórmesi, ulttyq oiyndar (kúres, arqan tartý, asyq atý, aqsúiek altybaqan, sadaq atý) qonaqtarǵa erekshe áser syilady. Ashyq aspan astynda balalarǵa arnaiy Sh.Aimanov atyndaǵy Qazaqfilm kinostýdiiasy túsirgen «Kúltegin», «Muzbalaq», «Qazaq eli» mýltfilmderi kórsetildi.
Aýqymdy shara aiasynda qazaq jáne orys tildi BAQ ókilderine qosymsha arnaiy press-týr uiymdastyryldy. Jýrnalister mýzeidiń búgingi hal-ahýalymen, sondai-aq, «Esik» qoryq-mýzeiiniń qorǵaý aimaǵyna enetin Rahat qalashyǵynda mýzei arheologtary júrgizip jatqan qazba jumysynyń barysymen tanysty. Mýzei direktory Tasqyn Toibaev árdaiym mýzei jumysyn nasihattap, el rýhaniiatyna úles qosyp jýrnalistermen qosa týrizm salasynda belsendi áriptestik ornatyp kele jatqan mamandardy da diplomdarmen marapattap, arnaiy syi-siiapat jasady.
Press-týrǵa «Qazaqstan» ulttyq teleaarnasy jańalyqtar qyzmetiniń jýrnalisi Amangeldi Seiithan, «Tańsholpan» aqparattyq-sazdy baǵdarlamasynan Qýanysh Nuraqynov, «Aiqyn» gazetiniń Almaty filialynan Abai Aimaǵanbet, Bugin.kz aqparattyq portalynan Marǵulan Aqan, Abai.kz aqparattyq portalynyń bas redaktorynyń orynbasary Nurgeldi Ábdiǵani, «Qazaqstan dáýiri» gazetinen Baýyrjan Karipov, Eńbekshiqazaq aýdandyq gazetinen Jansaia Ysqaq jáne «Shalqar» radiosynyń tilshisi – Erasyl Serikuly qatysty.
Is-sharanyń ashylý saltanatynda sóz sóilegen «Esik» memlekettik tarihi-mádeni qoryq-mýzeiiniń direktory Tasqyn Nurbaiuly Toibaev: «Ózderińiz bilesizder, mýzeidiń bilikti ǵylymi qyzmetkerleriniń jumysy nátijesinde osy ýaqytqa deiin Jetisý jerindegi Saq kezeńine jatatyn obalardyń tizimi, olardyń pasporty jasalyp, saqtalý, qorǵalý deńgeileri boiynsha anyqtaý, sondai-aq, arheologiialyq qazba jumystary turaqty túrde júrgizilip keledi. Altyn adam búginde elimizdiń brendine ainaldy. Mýzeige kelýshi sheteldik týristerdiń qatary jyl sanap artyp keledi. Bizde aǵylshyn, túrik, qytai, nemis tilinde ekskýrsiia júrgiziledi. Qyzmetkerlerdiń basym kópshiligi tarihshy, zertteýshiler, arheologtar. «Mýzei túnine» keler bolsaq, biyl osynaý sharany besinshi ret ótkizip otyrmyz. «Mýzei túni» Eńbekshiqazaq aýdany kóleminde jyl saiyn jergilikti turǵyndar men qala qonaqtary asyǵa kútetin rýhani, mádeni is-sharaǵa ainaldy. Osy ýaqyt ishinde el azamattary, mýzei isine qyzyǵýshylar, ónertanýshylar, sheteldik qonaqtar bizdi óte jaqsy tanyp-bilip qaldy deýge bolady. Sharanyń jyl saiyn qyzyqty ótýine atsalysyp kele jatqan aýdandyq mádeniet jáne tilderdi damytý basqarmasyna, mýzei men týrizm salasyndaǵy áriptesterimizge rahmet aitamyn», - dedi.
Resmi bólimnen keiin kontserttik baǵdarlama jurt nazaryna usynylyp, «Jibek joly» ansambli, «Ýlybka» bi toby siiaqty aýdandyq ónerpazdar óz ónerlerin ortaǵa saldy. Arailym Mamyrbekova, Nurtas Qairatuly ánnen shashý shashyp, kórermenderge kóterińki kóńil-kúi syilady.
Is-sharaǵa QR Mádeniet jáne sport ministrliginiń ókilderi, mýzei basshylary, belgili arheologtar, tarihshylar, ǵalymdar qatysty. Shara osy túnniń simvolikalyq oqiǵasy «Saq alaýyn» jaǵýmen aiaqtaldy. Bul keshte kelýshiler mýzeidiń tarihymen tanysyp qana qoiǵan joq, ony kózben kórip, júrekpen sezindi deýge tolyq negiz bar.
