Jambyl oblysyndaǵy Baizaq aýdandyq №8 órt sóndirý qyzmetiniń mamany Asyl Muhambetjanov áskeri qoimadaǵy jarylys kezinde adam shyǵyny ne sebepti kóp bolǵanyn aitty, dep habarlaidy Sputnik Qazaqstan.
"Oqiǵa ornyna birinshi bolyp barǵan biz edik. Aldymen barlaý jasaimyz ǵoi. Sol jerde "starshii kim?" dep surap edim, aǵa leitenant pa, maior ma, sol kisi menmin dedi, jarylatyn zat joq pa dep suradym, jarylatyn eshteńe joq dedi. Videony kórgen shyǵarsyz. Qara tútinniń ishinde órt sóndirýshiler júrdi. Arasynda men de barmyn. Sý berip jattym. Sol kezde jarylatyn zat joq pa dep taǵy suradym. Joq dep jaýap berdi", - dedi Muhambetjanov jýrnalisterge bergen suhbatynda.
Aýrýhanada jatqan tótenshe jaǵdailar qyzmetiniń taǵy bir mamany óz áriptesiniń sózin rastady. Almaz esimdi órt sóndirýshi áskeriler jarylys qaýpi bar ekenin aitpaǵanyn jetkizdi.
Al qorǵanys ministrligi taǵylǵan aiyptyń negizsiz ekenin málimdedi. Sebebi órt sóndirýshiler áskeri qoimaǵa barǵanda qaýip-qaterdiń bar ekenin bilgen.
"Másele mynada, órt sóndirýshiler komandasy kelgennen bastap bárin ózderi basqarady. Olarda nysannyń pasporty bar. Ishinde ne bar ekenin de biledi. Sondyqtan oqiǵa ornyna jetkenshe tiisti sheshim qabyldaidy. Ishki ister ministriniń №446 buiryǵyn qarap kórińiz. Sol qujatta bári jazylǵan. Kim jáne qalai áreket etedi, sonyń bári kórsetilgen", - dedi qorǵanys ministrliginde isteitin laýazymdy tulǵa Sputnik Qazaqstan tilshisine bergen suhbatynda.
Onyń aitýynsha, áskeri qoimada órt sóndirý jumystary bastalǵannan keiin shynymen de áskerilerdi qaýipsiz jerge kóshirgen.
"Olar – áskerge shaqyrylǵandar, áskeri boryshyn ótep júrgender. Jas jigitter ǵoi. Olarǵa qaýip tóne bastaǵanda qaýipsiz jerge shyǵardy. Al kelisimshartpen áskeri qyzmette júrgenderdiń bári qaldy. Qazir keibir buqaralyq aqparat quraldary áskeriler qashyp ketti dep jatyr. Eshkim qashqan joq. Biz jas balalardy qaýipsiz jerge shyǵarýǵa tyrystyq. Bul basty mindet bolǵan", - deidi áskeri sheneýnik.
