«Jas Otan»-nyń keibir músheleri Ortalyq keńeske «Ninety one» tobynan Dýlat Muxametqalievtiń sailanýyna qarsylyq bildirdi. Búgin «Rýxani jańǵyrý» sessiiasynda Aqtóbeden kelgen bir delegat «Nur Otan» partiiasy Tóraǵasynyń birinshi orynbasary Máýlen Áshimbaevqa saýal qoidy. Oǵan basqa qatysýshylar da qosyldy, dep xabarlaidy QazAqparat tilshisi.
«Meni tolǵandyryp júrgen bir másele bar. Búgin «Jas Otannyń» sezi ótip jatyr. Bári keremet, bári jaqsy. Biraq Ortalyq keńestiń músheligine sailaý ótti. Sonda «Ninety one» tobynda júrgen Dýlat esimdi azamat sailandy. Rýxani jańǵyrý dep aityp jatyrmyz ǵoi. Árkim árqalai túsinedi. Biraq men ózim rýxani jańǵyrýdy bylai túsinemin, ár qazaq óziniń qazaq ekenin túsinýi kerek. Elbasy da aityp jatyr ǵoi, ulttyq kodymyzdy saqtaý qajet dep. Al, endi, Dýlattyń «Jas Otanǵa» sailanýy rýxani jańǵyrýǵa jasalǵan qiianat emes pe?», - dedi Qýanyshbek Ábdiraxman.
Máýlen Áshimbaevtyń aitýynsha, biyl «Jas Otannyń» Ortalyq keńesine sailaý kezinde dástúrli jolmen birge áleýmettik jeliler de qoldanyldy. Jastar internet arqyly ózderi daýys berdi. «Jastarǵa kim unaidy? Keńeste kimdi kórgisi keledi? Ony da eskerip, Ortalyq keńeske jańa jolmen sailaý ótkizdik. Sóitip, eki jolmen keńestiń quramyn jasaqtap otyrmyz. Dýlatty jastar ózderi usyndy, ózderi daýys berdi. Sonyń nátijesinde keńeske kirip otyr. Biz ana azamattardy kirgizemiz, myna azamattardy kirgizbeimiz dep, ózimizshe saiasat júrgizgen joqpyz. Jastar kimdi qalaidy? Kimge kóp daýys beredi? Kimge demokratiialyq jolmen daýys beredi? Solardy da kirgizýge tyrystyq. Jastar ózderi búkil Qazaqstan boiynsha internet pen áleýmettik jeliler arqyly sailaý ótkizip, Dýlatty sailap aldy», - dep atap kórsetti M.Áshimbaev.
Partiia Tóraǵasynyń birinshi orynbasary «rýxani jańǵyrýdyń negizgi maqsaty - ulttyq qundylyqtardy dáripteý» degen qaǵidamen tolyǵymen kelisetinin de jetkizdi.
«Ózimizdiń ulttyq kodymyzdy saqtaý, ulttyq mádenietimizdi saqtaý, sóitip jahandaný zamanynda solardy joǵaltyp almaý máselesin Elbasy óz maqalasynda taiǵa tańba basqandai naqty kórsetip otyr. Sonymen qatar, bul jerde ekinshi bir úlken másele bar. Biz álemdegi bilim, ǵylym, texnologiia salasyndaǵy durys úrdisterdi túsinip, solarǵa ashyq bolýymyz qajet. Sananyń ashyqtyǵyn qalyptastyrýmyz qajet. Bizdiki ǵana durys, basqalardiki burys. Bizdiń ǵana jolmen júremiz degen áńgime bolmaý kerek. Álemde basqa úrdister bolsa, ásirese, bilim, ǵylym, texnologiia salasynda, sonyń bárine úirenýimiz kerek. Sonyń bárin Qazaqstanǵa tartýymyz kerek. Qazaqstandy damytýymyz kerek. Sóitip, sananyń ashyqtyǵyn qalyptastyrǵan kezde ǵana biz órkenietti memleket, órkenietti qoǵam bolyp qalyptasamyz, damyǵan memleketterge qosylamyz», - dedi M.Áshimbaev.
Al Ortalyq keńeske Dýlat Muxametqalievtiń sailanýyna qatysty Máýlen Saǵatxanuly jastarǵa óziniń aǵalyq aqyl-keńesin berdi.
«Qazaqstanda ártúrli jas bar, ártúrli pikirler bar, ártúrli oilar bar, ártúrli ustanymdar bolýy múmkin. Sondyqtan senderge aǵalyq bir aqyl-keńesimdi aitaiyn. Jastar birjaqty bolmaýy qajet, birjaqty stereotipterden arylý qajet. Sizder kishkene sanany keńeitip qarańyzdar, mynandai azamattar da bar, mynandai pikirler de bar. Olardyń oiy durys emes. Bizge qosylmaýy qajet. Ózimen-ózi júrýi kerek. Biz bir-birimizben aralaspaimyz degen áńgime bolmaýy qajet. Sizder barlyǵymen aralasýlaryńyz qajet. Bári - Qazaqstan jastary. Jan-jaqty bolý kerek. Dýlatpen sóilesińder. Aqyldasyńdar. Ol da qazaqtyń balasy ǵoi. Qazaqshasy jaqsy, tamasha sóileidi. Bólek júre bermei, ashyq sóilesińder. Sóitip, bir mámilege kelińder», - dedi M.Áshimbaev.
Aita keteiik, búgin «Jas Otan» jastar qanatynyń IV sezinde Ortalyq keńes músheleri sailandy. Olardyń ishinde «Ninety one» tobynyń ánshisi Dýlat Muhametqaliev te bar.
