Qazaqstannyń blokchein jáne kriptovaliýtalary qaýymdastyǵynyń tóraǵasy Eset Býtin "Halykcoin" atty kriptovaliýtaǵa qatysty pikir bildirdi, dep xabarlaidy "Ult aqparat" QazAqparat agenttigine silteme jasap.
"Jaqynda buqaralyq aqparat quraldarynda "Halykcoin" atty joba jaiynda aityldy. Biz atalǵan jobany jan-jaqty zerdelep shyqtyq. Osy jumysqa qarjygerler de, zańgerler de qatysty. Olardyń saraptamasy boiynsha Halykcoin - bul alaiaqtardyń jobasy. Ony anyq aita alamyn", - dedi E.Býtin búgin Astanada ótken baspasóz máslixatynda.
Uiym basshysynyń aitýynsha, Halykcoin-nyń resmi saitynda atalǵan jobamen ainalysatyn mekemeniń naqty mekenjaiy jáne taǵy basqa málimetter joq. Sondyqtan ony kim jáne qai jaqtan iske asyryp jatqany belgisiz. "Ol jigitter bir nárseni jaqsy istedi, bul - Qazaqstan azamattarynan aqsha jinaý mexanizmi. Saitty ashyp qarasańyz, aqshany kez kelgen ádispen salyp, Halykcoin-dardy satyp alýǵa bolady. Sosyn olar xalyqtyń senimine kirý úshin Halyk bank-tiń simvolikasyn paidalanǵan. Búgingi múmkindikti paidalanyp, xalyqty Halykcoin-dardy almaýǵa úndeimiz. Sebebi onyń astarynda alaiaqtyq bar dep sanaimyz", - dep atap kórsetti E.Býtin.
