Eseptik tirkeýsiz azamattarǵa qaryz bergen sýbektiler májbúrlep taratylady. Bul jaiynda QR Qarjy naryǵyn retteý jáne damytý agenttiginiń tóraiymy Mádina Ábilqasymovanyń Májilis depýtattarynyń saýalyna bergen jaýabynda aitylǵan, dep habarlaidy QazAqparat.
«Kreditteý naryǵynda biryńǵai retteýshilik aiany jáne tutynýshylardyń quqyqtaryn qorǵaýdyń biryńǵai júiesin qalyptastyrý úshin 2020 jylǵy 1 qańtardan bastap agenttiktiń retteý aiasyna halyqqa qaryz beretin barlyq zańdy tulǵalar – onlain kreditteý kompaniialary, lombardtar jáne kredittik seriktestikter engizilgenin atap ótemiz. Jumys istep turǵan sýbektilerdi eseptik tirkeýdiń shekti merzimi 2020 jylǵy 1 qyrkúiekte aiaqtaldy. 1 079 uiym (barlyq banktik emes uiymdardyń 33 paiyzy), onyń ishinde 650 lombard, 202 kredittik seriktestik jáne 227 mikroqarjy uiymy agenttikte eseptik tirkeýden ótti», - dedi ol.
Onyń atap ótýinshe, eseptik tirkeýden ótken sátten bastap barlyq kórsetilgen sýbektiler prýdentsiialyq normativterdi, mikrokredit berý týraly sharttarǵa qoiylatyn talaptardy, syiaqynyń shekti mólsherlemeleriniń shekteýlerin saqtaýǵa, qaryz alýshylardyń borysh júktemesiniń koeffitsientterin esepteýge jáne saqtaýǵa, sondai-aq tutynýshylardyń quqyqtaryn qorǵaý jónindegi ózge de talaptardy saqtaýǵa mindetti.
«Tirkeýden ótpegen 2 187 sýbektiden 1 196 sýbekt áreket etpeidi, 744-i qyzmetin jalǵastyrýǵa nieti emestigin, 247-si jarǵylyq kapitaldyń eń tómen mólsheri joq ekendigin habarlady. Azamattarǵa qaryz berý qyzmetin agenttikte eseptik tirkeýsiz jalǵastyrǵan jaǵdaida, bul sýbektiler májbúrlep taratylatyn bolady», - dedi Mádina Ábilqasymova.
