Senatta Úkimettiń jáne Esep komitetiniń 2020 jylǵy respýblikalyq biýdjettiń atqarylýy týraly esepterin qaraý kezinde kvazimemlekettik sektordaǵy kemshilikter aityldy, dep habarlaidy "Ult aqparat".
«Memleket basshysynyń tapsyrmasy boiynsha kvazimemlekettik sektordyń iri kompaniialarynyń kóbine aýdit júrgizildi. Tek 2020 jyly kvazimemlekettik sektordyń 25 sýbektisi jáne olardyń aktivteriniń 16 trln teńgesi aýditpen qamtyldy. 60 júielik problema men kemshilikter, 41 mlrd teńge qarjylyq buzýshylyq, 340 mlrd teńgege aktivterdi tiimsiz basqarý anyqtaldy», - dedi Respýblikalyq biýdjettiń atqarylýyn baqylaý jónindegi esep komitetiniń tóraǵasy Natalia Godýnova.
Onyń aitýynsha, ázirge, kvazimemlekettik sektordy joǵary tehnologiialyq ári tiimdi institýttarǵa transformatsiialaý tiisti nátije bermei otyr.
«Transformatsiia uzaqqa sozylyp barady, keshendi jospardy júzege asyrý qorytyndysy boiynsha jekeshelendirý tek 62 paiyzǵa qamtamasyz etildi», - dedi Esep komitetiniń basshysy.
Onyń paiymynsha, memlekettik aktivterdi basqarý boiynsha qadamdarǵa ózgerister engizý qajettigi týyndap otyr. Osy oraida kvazimemlekettik sektor sýbektileri qyzmetin strategiialyq josparlaýdy jetildirý kerek. Sonymen qatar borysh júktemesin qadaǵalaýdy kúsheitip, korporativti jáne divident saiasatyn naqty reglamentteý mańyzdy.
