Qazaq ádebieti men rýhaniiaty orny tolmas qaiǵyǵa dýshar boldy. 64 jasqa qaraǵan shaǵynda kórnekti qalamger, QR Memlekettik syilyǵynyń jáne memleketaralyq «Zvezda sodrýjestva», Resei gýmanitarlyq akademiiasynyń Býnin atyndaǵy syilyqtarynyń laýreaty, Qazaqstan Jazýshylar odaǵynyń Basqarma múshesi, Qazaqstannyń eńbek sińirgen baspa qyzmetkeri, «Parasat», «Qurmet» ordenderiniń iegeri Esenǵali Raýshanov dúnieden ozdy.
Bul týraly aqyn, Qazaqstan Jazýshylar odaǵy basqarma tóraǵasynyń birinshi orynbasary Aqberen Elgezek óziniń Facebook paraqshasynda jazdy, dep habarlaidy "Ult aqparat".
«Qadirli aǵaiyn!
Qazaqtyń asa kórnekti aqyny, Qazaqstan Respýblikasy Memlekettik syilyǵynyń laýreaty Esenǵali Raýshanovtan aiyrylyp qaldyq.
Alla aldynan jarylqasyn.
Asyl rýhy beiishtiń tórinde shalqysyn», - dep jazdy ol.
Esenǵali Ábdijapparuly Raýshanov 1957 jyly Qaraqalpaqstannyń Hojely qalasynda dúniege kelgen. 1976 -1980 jyldary Ál-Farabi atyndaǵy Qazaq ulttyq ýniversitetin bitirgen.
1973 jyly Qyzylorda oblysy, Jańaqorǵan aýdany, Kelintóbe sovhozyndaǵy №192 orta mektepti bitirgen soń, 1975–1977 jj. Keńes áskeri kúshteri qatarynda Soltústik Kavkaz áskeri okrýginde qyzmet atqardy. QazMÝ-diń jýrnalistika fakýltetin bitirgen.
Eńbek jolyn Ózbekstannyń Jyzaq oblysy Myrzashól aýdanyndaǵy «Dostyq» gazetinde ádebi qyzmetker, bólim meńgerýshisi bolyp bastaǵan. Ár jyldary «Jalyn» jýrnalynda bólim meńgerýshisi, «Arai» jýrnalynda poeziia bóliminiń meńgerýshisi, jaýapty hatshy, «Zerde» (burynǵy «Bilim jáne eńbek») jýrnalynyń bas redaktory (1988 — 95), 1995 jyldan «Jazýshy» baspasynyń direktory boldy.
Alǵashqy jyr jinaǵy «Bastaý» degen atpen 1980 jyly jaryq kórdi.
«Kelintóbe» (1984), «Sholpan juldyz týǵansha» (1988), «Ǵaisha bibi» (1991, «Alash» syilyǵyn aldy), «Qara baýyr qasqaldaq» (1995) atty jyr kitaptary jaryq kórgen. Óleńderi men poemalary orys, litva, ýkrain, bolgar, cheh, ózbek, qyrǵyz tilderine aýdarylǵan.
