Qazaqstannyń mádeniet jáne sport ministrligi kelesi jyly amerikalyq The World's Best shoýyna Erjan Maksimniń kandidatýrasyn usynady. Bul týraly T.Júrgenov atyndaǵy Qazaq ulttyq óner akademiiasynyń rektory Ashat Maemirov málimdedi, dep habarlaidy "Ult aqparat".
Reseilik "Golos. Deti" jobasynyń sýperfinalisi Erjan Maksim 2020 jyly The World's Best shoýynda baq synaýy múmkin.
"Halyqaralyq saiystarǵa qatysý máselesin ministrlik sheship jatyr. Biyl "Balalar Evrovideniesi" ótip ketti. Endi Ulybritaniia, Amerika bar. Biyl bizden The World's Best shoýyna eki adam – Daneliia men Dimash qatysty ǵoi. Kelesi jyly ministrlik Erjannyń kandidatýrasyn usynady", - dedi Maemirov mádeniet jáne sport ministrliginde ótken baspasóz máslihatynda.
The World's Best – álemniń túkpir-túkpirinen jinalǵan talanttar baq synaityn amerikalyq shoý. Jobanyń birinshi maýsymyna qazaqstandyq jas ánshiler Daneliia Tóleshova men Dimash Qudaibergen qatysty.
Keiinirek Dimash balalarǵa jol berýdi jón kórip, shoýǵa odan ári qatysýdan bas tartty. Al Daneliia Tóleshova Grand-finalǵa óte almai qaldy.
