Qazaqstandyq jas daryndy ánshi Erjan Maksim ekinshi oryn alǵan reseilik "Golos. Deti" baiqaýynyń finaldaǵy nátijesiniń kúshi joiyldy, dep habarlaidy "Ult aqparat".
Birinshi arna jasaǵan málimdemede shoýdyń daýys berý kezeńine syrttan yqpal bolǵany aitylǵan.
"Tekserýdiń aralyq nátijesi kórsetkendei, daýys berý kezeńinde syrttan yqpal bolyp, bul shoý qorytyndysyna áser etti. Group-IB tolyq esepti mamyrdyń sońyna deiin usynady, aralyq qorytyndy negizinde Birinshi arna "Golos. Deti" jobasynyń altynshy maýsymynyń nátijesiniń kúshin joiýǵa sheshim qabyldady", - delingen habarlamada.
Eske sala ketsek, shoýdyń aqtyq kezeńindegi daýys berý nátijesi qoǵamnyń narazylyǵyn týdyryp, shý bolyp ketken edi. Daýys berý nátijesinde ataqty reseilik ánshi Alsýdyń 10 jasar qyzy Mikella Abramova 56,5% daýys jinap, "Golos. Deti" jobasynyń jeńimpazy atanǵan bolatyn. Birinshi arna final qorytyndysyn tekserip, tipti Group-IB halyqaralyq kompaniiasyn tergeýge jumyldyrdy.
Group-IB habarlaǵandai, Mikella Abramovanyń nómiri – 7 sanyna shekten tys kóp mólsherde SMS habarlama avtomatty túrde jiberilip otyrǵan. 300 shaqty telefon nómirinen 8 myńnan astam habarlama túsipti.
Birinshi arna habarlaǵandai, 24 mamyr kúni "Golos.Deti" baiqaýynyń arnaiy bólimi barlyq finalisterdiń qatysýymen tikelei efirde kórsetiledi. Al kelesi maýsymǵa deiin daýys berý mehanizmi jańartylmaq.
