قازاقستاندىق جاس دارىندى ەنشٸ ەرجان ماكسيم ەكٸنشٸ ورىن العان رەسەيلٸك "گولوس. دەتي" بايقاۋىنىڭ فينالداعى نەتيجەسٸنٸڭ كٷشٸ جويىلدى, دەپ حابارلايدى "ۇلت اقپارات".
بٸرٸنشٸ ارنا جاساعان مەلٸمدەمەدە شوۋدىڭ داۋىس بەرۋ كەزەڭٸنە سىرتتان ىقپال بولعانى ايتىلعان.
"تەكسەرۋدٸڭ ارالىق نەتيجەسٸ كٶرسەتكەندەي, داۋىس بەرۋ كەزەڭٸندە سىرتتان ىقپال بولىپ, بۇل شوۋ قورىتىندىسىنا ەسەر ەتتٸ. Group-IB تولىق ەسەپتٸ مامىردىڭ سوڭىنا دەيٸن ۇسىنادى, ارالىق قورىتىندى نەگٸزٸندە بٸرٸنشٸ ارنا "گولوس. دەتي" جوباسىنىڭ التىنشى ماۋسىمىنىڭ نەتيجەسٸنٸڭ كٷشٸن جويۋعا شەشٸم قابىلدادى", - دەلٸنگەن حابارلامادا.
ەسكە سالا كەتسەك, شوۋدىڭ اقتىق كەزەڭٸندەگٸ داۋىس بەرۋ نەتيجەسٸ قوعامنىڭ نارازىلىعىن تۋدىرىپ, شۋ بولىپ كەتكەن ەدٸ. داۋىس بەرۋ نەتيجەسٸندە اتاقتى رەسەيلٸك ەنشٸ السۋدىڭ 10 جاسار قىزى ميكەللا ابراموۆا 56,5% داۋىس جيناپ, "گولوس. دەتي" جوباسىنىڭ جەڭٸمپازى اتانعان بولاتىن. بٸرٸنشٸ ارنا فينال قورىتىندىسىن تەكسەرٸپ, تٸپتٸ Group-IB حالىقارالىق كومپانيياسىن تەرگەۋگە جۇمىلدىردى.
Group-IB حابارلاعانداي, ميكەللا ابراموۆانىڭ نٶمٸرٸ – 7 سانىنا شەكتەن تىس كٶپ مٶلشەردە سمس حابارلاما اۆتوماتتى تٷردە جٸبەرٸلٸپ وتىرعان. 300 شاقتى تەلەفون نٶمٸرٸنەن 8 مىڭنان استام حابارلاما تٷسٸپتٸ.
بٸرٸنشٸ ارنا حابارلاعانداي, 24 مامىر كٷنٸ "گولوس.دەتي" بايقاۋىنىڭ ارنايى بٶلٸمٸ بارلىق فيناليستەردٸڭ قاتىسۋىمەن تٸكەلەي ەفيردە كٶرسەتٸلەدٸ. ال كەلەسٸ ماۋسىمعا دەيٸن داۋىس بەرۋ مەحانيزمٸ جاڭارتىلماق.
