Reseilik "Golos. Deti" jobasynda ekinshi oryn alǵan Erjan Maksimniń anasy Gúlmira Álibek shoýdyń nátijesi men Erjanǵa qandai usynystar túsip jatqanyn aitty, dep jazady Sputnik agenttigi.
"Talklike" baǵdarlamasyna bergen suhbatynda Gúlmira Álibek: "Golos. Deti" baiqaýynyń nátijeci jariialanǵannan keiin áttegen-ai degen jerimiz boldy. Óitkeni Erjan ándi bar kúsh-jigerimen, daýsy kishkene jetpei qalsa da, joǵary deńgeide aityp shyqty dep oilaimyn", - dedi.
"Golos. Deti" jobasy
Joba barysynda Valerii Meladze Erjan tek qazaqsha sóilegendikten, onymen jumys isteý qiyndaý ekenin aitqan bolatyn. Biraq qiyndaý bolsa da, ol soǵan turarlyq talant dep baǵalady. Sondyqtan Meladze Erjanmen biraz qazaqsha sóilese bastapty.
"Valerii Meladze Erjanǵa: "Kel qasyma otyr, ainalaiyn" deitin. Baǵdarlama efirinde tek "ainalaiyn" degeni ǵana estilip qalypty. Ol kisiniń qazaq tilin qaidan úirengenin suradym. "Maǵan qazaq tilin Batyrhan úiretti" dep jaýap berdi",- deidi Gúlmira Álibek.
Onyń aitýynsha, baiqaý barysynda Erjanǵa kóptegen ánder usynylǵan. Alaida Erjan Dimash Qudaibergenniń repertýaryndaǵy ándi oryndaimyn dep sheshipti.
"Birneshe án usynyldy. Bireýinde aktsent bolsa, endi biri daýsyna kelmeidi. Erjan kishkentaiynan joǵary diapazondy ánderdi jaqsy kóredi. Erjan Dimashtyń izin qýyp kele jatqan inisi dep oilaimyn. Óitkeni barǵan jerinde Dimashty aýzynan tastamaidy. Dimashtyń repertýaryndaǵy ánderdiń kóbi unaidy. All by Myself pen Adagio ánderin tańdady", - deidi ánshiniń anasy.
Gúlmira Álibektiń aitýynsha, "Golos. Deti" uiymdastyrýshylary bul ánderdiń bala úshin qiyn ekenin aitqan. Alaida Erjan aitqanynan qaitpai, mamandarmen jumys istep, daiyndalypty.
"Valerii Meladze Erjan Adagio-ny aitqanda, daýsyna zaqym keledi dep ýaiymdaityn. Kózine jas tolatyn. Kóptegen adamdar Valerii Meladzeniń bala úshin mundai qiyn án tańdaýy durys emes degen pikir jazyp jatyr. Ol kisiniń eshqandai kinási joq. Erjan osy ándi aita alatynyna senimdi boldy. Aityp bere aldy dep oilaimyn", - deidi ol.
Erjan Dimashtyń ánderin tyńdaǵanda shabyttanatynyn aitady. Dimashpen birge óner kórsetýdi armandaidy eken.
"Slavian bazaryna" ekeýimiz bir sahnada óner kórsetkenbiz. 10-15 balany iriktep, óziniń "Baqytty bala" atty baiqaýyna qatystyrdy. Men sol baiqaýda bas júlde aldym. Osy jyly baiqaýǵa qonaq bolyp baramyn", - deidi Erjan.
Gúlmira Álibek júrgizýshiniń "Golos. Deti" baiqaýynda Mikella Abramovanyń jeńiske jetýine qarajattyń kómegi boldy ma degen saýalyna da jaýap berdi.
"Alsý óte qarapaiym, ózi de, qyzy da óte jaqsy. Aqsham bar dep, shalqaiyp júretin kisiler bolady ǵoi. Ondai minezin baiqaǵan joqpyz. Birge otyryp, birge tamaq iship, áńgimelesip júretinbiz. Aqsha jaǵy kómektesti dep aita almaimyn. Múmkin halyq, shynymen, solai daýys bergen bolar", - dedi Gúlmira Álibek.
"Jeńbegenim jaqsy boldy"
Al Erjan Maksimniń ózi jobada bas júlde almaǵanyna qýanyshty ekenin aitty.
"Bas júlde alsam, quttyqtap qoia salatyn edi. Jeńbegen soń, adamdar qolpashtap, kóp adam tanyp, ánshiler óz paraqshalaryna meniń sýretterimdi salyp jatty. Bul meni óte qýantty. Bireýleri ekinshi oryn úlken dáreje ekenin aity. Endi biri sen men úshin jeńimpazsyń dep jazdy", - deidi jas ánshi.
"Jurttyń bári kúldi..."
Gúlmira Álibek Erjannyń boiyndaǵy daryndy qai kezde baiqap, ustazǵa aparǵanyn aitty.
"Joldasym 40 jasqa tolǵanda, Erjan beste edi. Toida ana jáne áke týraly eki án aityp bereiinshi dedi. Kishkentai bolǵannan keiin shatasyp keter dep aldyn ala "pliýs" jazdyrýdy usyndyq. Biraq ol "joq, men ózim aita alamyn" dedi. Ándi ortaǵa shyǵyp aitqanda, esh qysylmady. Erkin ári taza oryndap berdi. Sol jerdegi mýzykanttar kelip, Erjan "pliýspen" aityp tur ma, álde "minýspen" aitty ma dep surady. Bár tańǵalyp, Erjandy vokalǵa aparýǵa keńes berdi. Sol kezde sheshim qabyldadyq", - deidi Erjanyń anasy.
Týǵan kúnnen keiin bir-eki kún ótken soń, mádeniet úiiniń án úiirmesine aparǵan. Erjannyń ánin tyńdaǵan pedagogtar da tańǵalypty.
"Ol "Baldáýren" degen baiqaýǵa qatystyryp kóreiik dedi. Ońai ánderdi usyndyq. Biraq Erjan olardy unatpady. "Týǵan el" degen kúrdeli ándi berdik. Árip te tanymaidy ǵoi ol kezde. Tyńdap otyryp, sózin jattap, sol baiqaýǵa qatysyp, ekinshi oryn aldy. Osyndai qiyn ándi sahnadan da kórinbeitin kishkentai bala, aityp bergende jurttyń bári kúldi. Biraq ónerine tánti bolyp, qol shapalaqtady", - deidi Gúlmira Álibek.
Erjannyń óner joly osy baiqaýdan bastalypty. Oblystyq, respýblikalyq baiqaýlarda shyńdalyp, joǵary deńgeige jetken.
Erjannyń otbasy
"Erjannyń atasy kezinde án aitqan. Áli kúnge deiin gormoshka, dombyramen án aitady. Meniń ákem de akkordeonda oinap, án shyrqaidy. Joldasym da, men de, qyzdarym da kásibi mýzykant bolmaǵanmen, habarymyz bar",- deidi Erjannyń anasy.
Erjannyń ata-anasy balasynyń ónerdegi qadamdaryn qoldaý úshin mamandyǵy boiynsha jumys istemeidi eken.
"Men - psihologpyn. Mamandyǵym boiynsha qyzmet istedim. Qazir Erjan óner jolyna kelgeli jumysymdy qoiyp, Erjanmen júrmin. Ákesi de Erjan úshin jumysyn qoidy. Biraq qosymsha jumysy bar, taksi júrgizýshisi boly isteidi. Erjannyń eki ápkesi bar. Erjan dúniege kelgende bári ánshi týdy dep aitqan bolatyn. Óitkeni daýsy zor boldy. 3 jasynda kez kelgen ánge qosyla ketkende, tańǵalyp otyratynbyz. Dostarymyz óte talantty dep aita bastady", - dedi Gúlmira Álibek.
Erjannyń aldaǵy jospary
Erjan maýsym aiynda ótetin MÝZ-TV arnasynyń kontsertine shaqyrtý alǵan.
"Arman Dáýletiiarov ózi habarlasty. "Qazir Amerikadamyn, kórip, estip jatyrmyn. Qazaq baýyrymnyń osyndai úlken qoshemetke bólenip jatqanyn estip, óte riza boldym" dedi. Jazda MÝZ-TV premiiasyna shaqyrdy. Ol osy qurmetke laiyq. Dimashtyń da osy kontsertke qatysatynyn estigenbiz. Shaqyrǵanda tóbemiz kókke jetip, senbei qaldyq. Men sizdermen birgemin. Árqashan qoldaimyn dedi. Erjannyń ózi jeke án oryndaýy tiis", - deidi ánshiniń anasy.
Jobadan soń Erjanǵa birneshe usynys túsken eken. Qazir ol otbasymen birge tańdaý jasaýda.
"Londonnan habarlasty. Britaniianyń H-faktor jobasyna shaqyrtyp jatyr. Oilanyp otyrmyz. Sabaqtary qalyp qoidy. Onyń ústine, Erjan aǵylshyn tilin oqýy kerek. Endi basty maqsat – Erjandy mýzykalyq mektepke berip, bilimin shyńdaý. Túsip jatqan usynystardy otbasymyzben, mamandarmen aqyldasa otyra, sheshim qabyldaimyz. "Golos. Deti" baǵdarlamasynan bólek, Iýnaited degen kompaniiamen bir jarym jylǵa kelisimshart jasadyq. Onyń aiasynda joba finalisteri týr jasaidy. Joǵary kóterilgeni jaqsy ǵoi, biraq elimizde bolsa eken. Áli kishkentai, daýsy synady deidi ǵoi. Sondai kezderden ótý kerek. Eseie kele kóre jatarmyz", - deidi Gúlmira Álibek.
Erjannyń ózi 2 ai boiy sabaqqa barmaǵanyn aitady.
"Bárin saǵyndym. Apaiym habarlasyp, quttyqtady. Synyptastyrym da erekshe quttyqtap jatyr. Kóp alǵys aitamyn", - deidi Erjan.
Erjan baǵdarlamaǵa Alla Pýgacheva syilaǵan alqamen kelgen. Mádeniet ministrimen kezdesýde IPad mini planshetin alǵanyn aitty. Onyń aldynda "Golos. Deti" jobasynda Samsung planshetin syilaǵan. Evrovidenieniń irikteý kezeńinde Samsung telefonyn alypty. Biraq Erjan Iphone-dy ózim aldym dep kúledi.
Aita keteiik, 26 sáýirde Reseidiń birinshi arnasynda "Golos. Deti" shoýynyń finaly kórsetildi. Daýys berý qorytyndysy boiynsha ánshi Alsýdyń qyzy Mikella Abramova jeńiske jetti. Al qazaqstandyq ánshi Erjan Maksim ekinshi oryn ielendi. Biraq kórermender final ádil ótpegenin aityp, shý shyǵardy.
Kóptegen reseilik ártister qazaqstandyq ánshige qoldaý bildirip, ony naǵyz jeńimpaz dep biletinin aitty.
