2013-2017 jyldar aralyǵynda qazaqstandyq 5 myńǵa jýyq azamat radikaldy railarynan qaitty. Bul týraly búgin Almatyda ótip jatqan Qazaqstan musylmandarynyń VIII quryltaiy barysynda málim boldy, dep habarlaidy "Ult aqparat".
Eske salsaq, búgingi quryltai barysynda Qazaqstannyń 2018-2022 jyldar kezeńi aralyǵyndaǵy bas múftii bolyp Serikbai qajy Orazuly sailandy.
Qazaqstan musylmandary dini basqarmasynyń burynǵy Bas múfti Erjan qajy Malǵajyuly ózi qyzmet atqarǵan 2013-2017 jyldar aralyǵynda iske asyrylǵan jumystar jóninde esep berdi.
Erjan Malǵajyuly atap ótkendei, ótken tórt jylda atqarylǵan jumystar nátijesinde jat aǵymnyń arbaýynda júrgen 940 azamat hanafi mazhabyn tańdap, qatarymyzǵa qosyldy. Sondai-aq 4967 adam radikaldy railarynan qaitqan.
«Biz 2014 jyly dini jolymyz ben baǵdarymyzdy aiqyndaityn, memleket tutastyǵynyń nyǵaia túsýine septigin tigizetin Dini basqarmanyń 2020 jylǵa deiingi damý tujyrymdamasyn qabyldadyq. Dini qyzmettiń sapasyn arttyrýǵa arnalǵan 4 baǵytty bekittik. Olar - kórkem ýaǵyz, jat aǵymnyń jeteginde ketken jastarmen jumys, qaiyrymdylyq is-sharalar jáne halyqty dini saýattandyrý.
Elimizdegi musylman qaýymyn birlikke úndep, ózge din ókilderimen beibit ómir súrýge shaqyratyn QMDB-nyń Tuǵyrnamasyn bekittik. Mazhab pen nanym-senimde jikke bólinbeýge shaqyratyn qujat óz jemisin berýde. Atalmysh Tuǵyrnama - Qazaqstan Respýblikasy Konstitýtsiiasynyń senim bostandyǵy týraly ustanymyna, Qazaqstan Respýblikasynyń «Dini qyzmet jáne dini birlestikter týraly» Zańyna, elimizdiń 2050 jylǵa deiingi Strategiialyq damý josparyna, QMDB-nyń Jarǵysyna negizdelip ázirlengen strategiialyq qujat», - dep atap ótti ol.
Sondai-aq málim etilgendei, meshittegi jamaǵattyń aýyzbirshiligin arttyryp, biregei qulshylyq jasaý tártibin ornatý maqsatynda QMDB meshitteriniń Erejesi qabyldandy. 2015 jyly aqpanda elimizde tuńǵysh ret «Islam - beibitshilik pen kelisim dini» taqyrybynda I respýblikalyq imamdar forýmy ótti. Shara aiasynda «Qazaqstan musylmandary dini basqarmasynyń tuǵyrnamasy», «Din qyzmetkeriniń etikasy», «Imamnyń tulǵalyq kelbeti», «Musylman kelbeti» atty mańyzdy qujattar qabyldandy.
«QMDB janyndaǵy Ǵulamalar keńesiniń jańa quramy jasaqtaldy. Keńeste 17 ǵalym jumys isteidi. Onyń 9-y ǵylym doktory, qalǵany magistrler. Biz Dini basqarma qyzmeti aiasynda 2014-2015 jyldy «Din men dástúr» jyly dep jariialadyq. QMDB janynan dini bilimi tereń, tájiribesi mol bilikti din ǵalymdarynyń basyn biriktirgen aqparattyq nasihat toptary quryldy. Olar halyq arasynda túsindirý jumystaryn júrgizdi. Jat aǵymǵa ketken jastarymyz dástúrli hanafi mazhabyn tańdap, ortamyzǵa oralýda. 2017 jyly atqarylǵan jumystar nátijesinde jat aǵymnyń arbaýynda júrgen 940 azamat hanafi mazhabyn tańdap, qatarymyzǵa qosyldy. 2013-2017 jyldar aralyǵynda jalpy sany 4967 adam radikaldy raiynan qaitty», - dedi ol.
Aita ketsek, Qazaqstan musylmandary dini basqarmasynyń keńsesi 2014 jyly Almatydan Astana qalasyna kóshirilgen bolatyn.
