Almaty qalasy ákiminiń orynbasary Erjan Babaqumarov, QR Bala quqyqtary jónindegi ýákil Arýjan Sain jáne qalalyq bilim basqarmasynyń basshysy Lázzat Jylqybaeva jetim balalarǵa arnalǵan mamandandyrylǵan «Januia» keshenine bardy, dep habarlaidy "Ult aqparat".
«Januia» mamandandyrylǵan kesheninde jetim jáne ata-anasynyń qamqorlyǵynsyz qalǵan balalar, oqytý men tárbieleýde kelip-ketý rejimi ornatylǵan balalar jáne múmkindigi shekteýli balalar oqidy.
Keshendi aralaý barysynda balalardyń turý jaǵdaiyn jaqsartý, sapaly oqytýdy qamtamasyz etý úshin oqý materialdarymen jabdyqtaý máseleleri talqylandy. Mekeme tárbielenýshileriniń durys tamaqtanýy máselelerine jeke nazar aýdaryldy.
Mekeme aýmaǵynda balalar men qyzmetkerlerdiń infektsiia juqtyrýyn boldyrmaý maqsatynda sanitarlyq-epidemiialyq talaptardyń saqtalýy jáne barlyq qajetti qorǵanys quraldarymen qamtamasyz etilýi tekserildi.
Jiyn qorytyndysy boiynsha ákimniń orynbasary Erjan Babaqumarov Bilim basqarmasy men mamandandyrylǵan mekeme basshylyǵyna «Januia» kesheninde oqityn jetim jáne múmkindigi shekteýli balalardyń quqyǵyn qamtamasyz etý boiynsha naqty tapsyrmalar berdi.
