Tanymal saiasattanýshy, Qazaqstannyń strategiialyq zertteýler institýtynyń burynǵy direktory Ermuhambet Ertisbaev «Beibit jinalystar týraly» zańǵa qatysty pikirimen bólisti, dep habarlaidy QazAqparat.
«Andrei Chebotarev – ol tanymal qazaqstandyq saiasattanýshy. Ony qatty qurmetteimin ári kópten beri bilemin. Strategiialyq zertteýler institýtynyń direktory bolǵanymda tabandy túrde jumysqa shaqyrǵan edim. Biraq, ol kelispedi jáne táýeldi saiasattanýshy bolǵysy kelmeitindigin ashyq aitqan bolatyn. Kóp kitap shyǵardy, monografiialar jazdy. Ol «Beibit jinalystar týraly» jańa zań – bul eń baiypty jetistik» dep aitqany bar. Onyń bul baǵalaýymen tolyqtai kelisemin. Óitkeni, Memleket basshysy 2019 jyldyń jazynda Prezidenttik sailaýda jeńiske jetkennen keiin, Ulttyq qoǵamdyq senim keńesin quryp, óziniń baǵdarlamalyq maqsattaryn jariia etken kezde beibit jinalystar týraly jańa zań qabyldaý qajettigin aitqan bolatyn. Búginde bul zańnyń jumys istep turǵanyn kórip otyrmyn», - dedi Ermuhambet Ertisbaev.
Onyń atap ótýinshe, zańdy tolyqqandy qoldanýǵa pandemiia kedergi keltirdi.
«Demokratiialyq partiia (Qazaqstanda tirkelmegen partiia) úsh ret miting ótkizip úlgerdi. Pandemiia kezeńinde osynaý saiasi belsendiliktiń qatty tómendep ketýi basqa másele. Eger ol bolmaǵanda «Beibit jinalystar týraly» bul zań munan da kóbirek qoldanylar edi dep oilaimyn. Elimizde mundai keń aýqymdy sailaýshylar toby narazylyǵynyń bolýyna, Prezidenttik sailaýlardyń kúrdeliligine qaramastan Memleket basshysy óziniń sailaýda jeńiske jetkizgen saiasi sózine adal bolǵandyǵyn atap ótkim keledi. Eger 2019 jyldyń naýryzynan bastap alar bolsaq, onda «Beibit jinalystar týraly» zań – bul shynymen de eń baiypty jetistik», - dedi saiasattanýshy.
Ol atalǵan zańnyń Konstitýtsiiamen de sáikestendirilgendigine nazar aýdartady.
«Al ol negizgi zańymyz jáne onda Qazaqstan azamattarynyń beibit jinalystar men mitingiler ótkizýge quqyǵy bar ekendigi taiǵa tańba basqandai jazylǵan. Bul erterekte oppozitsiia «bilik ruqsat bermeidi, ol jumys istemeidi» dep synap kelgen Konstitýtsiiadaǵy norma. Onyń da negizgi bar. Óitkeni, 8 jyl boiy Qazaqstanda eshqandai miting bolǵan emes. Bilik ÚEU negizinde birde-bir ret ruqsat bermedi. Al endi «Beibit jinalystar týraly» zań jumys istep tur», - dedi Ermuhanbet Ertisbaev.
