Jýrnalist Baian Hasanova Qazaqstandaǵy áielderge qarsy zorlyq-zombylyqtyń aldyn alý týraly zańmen alysyp jatqan depýtattar men áielin uryp óltirý isi boiynsha tergelip jatqan Qýandyq Bishimbaevty aqtap alý "operatsiialary" týraly sóz qozǵady. Bul týraly "Ult aqparat" habarlaidy.
Buǵan deiin Májilis depýtattary Ermurat Bápi men Amanjol Áltai "Áielder men balalar quqyǵyna qatysty" zań ákeler rólin tym súmereitip jibere me degen alańdaýshylyǵyn jetkizgen bolatyn. Jýrnalist depýtattar zań shyǵaratyn, zań qabyldaityn jerde otyrǵanymen zańnan habary joq pa dep alańdaidy.
"Myna aýrý qoǵam eki jaqtan qysyp bitti. Bir jaǵy, depýtattar otyr, áielderge qarsy zorlyq-zombylyqtyń aldyn alý týraly zańmen alysyp. Ol erkekterdiń qoǵamdaǵy rólin kishireitedi-mish. Sol zań qabyldansa, áielder olardy basynyp, olar súmireiip qalady-mysh. Osyny aityp otyrǵan adamnyń ózi - qoǵamdaǵy streotipterdiń qurbany. Zań shyǵaratyn, zań qabyldaityn jerde otyryp, zańnan habary joq pa dedim. Bul zań zábir kórgenniń bárin qorǵaitynyn, jaýyzdar aiaǵyn tartyp júretinin túsinbei me, álde kezekti spektakl me? Túske deiin osyǵan ashýlanyp alǵan edim. Myńmen jalǵyz alysqan Juldyz Súleimenova hanymnyń jaýabyn estip qana, kóńilim ornyna tústi", - dep jazdy Baian Hasanova.
Budan keiin jýrnalist Qýandyq Bishimbaevty aqtaýǵa kirisken advokattardyń sózine shúilikti. Aita keteiik, eks-ministrdiń advokattary Bishimbaev áieliniń ólimine ózin kináli sezinbeitinin jetkizgen edi.
"Endi mine, tústen keiin úsh áiel otyryp alyp, Bishimbaevty aqtaýǵa kóshipti. Kádimgidei júrekteri eljirep, “ol súiikti jarynan aiyryldy, ózi áli sene alar emes” deidi. Sózim joq. Ádeii óltirmegen, jai erli-zaiyptylar arasyndaǵy tóbeles qoi dep qoiady. Tóbeles norma bolǵany ǵoi olar úshin. Árine ondai qylmyskerdi osylai oilaityndar ǵana qorǵaidy. Eshqandai tikelei aiǵaq joq deidi. Tikelei aiǵaq Saltanat tirilip kelip, oqiǵany baiandap berse ǵana bolady. Bizdiń gýmandy advokattar oǵan da senbeýi múmkin", - dedi jýrnalist.
Sondai-aq jýrnalist advokattardan suhbat alǵan interviýer Gúljan Erǵalievaǵa da nazyn jetkizdi.
"Gúljan Erǵalievanyń tańdanǵanyn aitsańyzshy. Demek, bul istiń astarynda gáp bar eken ǵoi dep. Gáp sol, sizderge jerge túsý kerek. Siz nadan dep ataǵan, Altyn orda jaqta turatyn, súiikti Almatyńyzdy qyzǵanatyn halyqtyń ózi jaǵdaidyń aq-qarasyn ajyratyp, sizge qaraǵanda jaqsy túsinip otyr. Intýitivti túrde neniń aiýandyq, neniń zorlyq-zombylyq ekenin biledi. Óitkeni ondai jaǵdaimen sizge qaraǵanda jiirek betpe-bet keledi.
Ólimnen uiat kúshti deidi ǵoi. Osy úsh áiel men depýtat úshin nege ekenin, men uialyp baramyn. Ári erteńim úshin qorqa bastadym, - dep jazdy Baian Hasanova.
