Foto: Reuters
Senat tóraǵasy Máýlen Áshimbaev erteń "Qazaqstannyń Tuńǵysh Prezidenti – Elbasy týraly" konstitýtsiialyq zańnyń kúshi joiylatynyn málimdedi, dep habarlaidy Sputnik Qazaqstan.
Parlamenttiń jańa reglamentine sáikes, konstitýtsiialyq zańdar eki palatanyń birlesken otyrysynda qaralady. Otyrys 13 qańtarǵa belgilenip otyr.
"Erteń biz Parlament palatalarynyń birlesken otyrysynda "Qazaqstannyń Tuńǵysh Prezidenti – Elbasy týraly" konstitýtsiialyq zańnyń kúshin joiamyz. Májilis depýtattary bastamashy bolǵan tiisti zań jobasy bar. Ol qujat tártip boiynsha qaraldy. Árine, konstitýtsiialyq sottyń sheshimi de mańyzdy", - dedi Áshimbaev jýrnalisterge bergen suhbatynda.
Al tilshiler Elbasy týraly konstitýtsiialyq zańnyń kúshin joiý máselesi nege uzaqqa sozylǵanyn surady.
"Sizder konstitýtsiialyq sottyń sheshimin kútkendei boldyńyzdar. Nege referendýmnan keiin birden ol zańnyń kúshi joiylmady?", - dedi tilshiler. Senat spikeri bári retimen jasalǵanyn jetkizdi.
"Konstitýtsiialyq sottyń sheshimi óte mańyzdy, bul – sońǵy sheshimdi qabyldaityn bizdiń memlekettik institýt. Oǵan deiin tiisti zań jobasy májiliste qaraldy, bári óz retimen, kezegimen júrip jatty. Sondyqtan bul sheshim referendýmnan keiin qabyldanýǵa tiis bolatyn, óitkeni referendýmda halyq solai daýys berdi. Biz konstitýtsiialyq sottyń sheshimi shyqty dep, eki kúnnen keiin qarastyraiyn dep jatqan joqpyz. Zań jobasy tiisti komitetterde qaraldy, endi erteń parlament birlesken otyrysta óz sheshimin shyǵarady ", - dep atap ótti Áshimbaev.
