Qazaqstannyń Bas prokýratýrasynyń ótinishimen biznesmen Jomart Ertaevqa Reseide turýǵa berilgen quqyqtyń kúshi joiyldy, - dep habarlaidy "Ult aqparat" Bas prokýratýranyń baspasóz qyzmetine silteme jasap.
Bas prokýratýra ókilderi "RBK Bank" AQ direktorlar keńesi tóraǵasynyń eks-keńesshisin Resei Federatsiiasynan ekstraditsiialaýǵa qatysty sharalardy qoldanyp jatyr.
Eske sala keteiik, biznesmen banktiń 160 million dollar qarajatyn jymqyrdy degen kúdikke ilinip, izdestirilýde.
"Qazaqstan Respýblikasy Bas prokýratýrasynyń haty boiynsha 2018 jyldyń 14 maýsymynda Máskeý soty úi qamaýy túrindegi bultartpaý sharasyn 8 qarashaǵa deiin uzartty. Sonymen qatar, bizdiń ótinishhatymyz boiynsha Reseidiń IIM-niń Máskeý qalasy boiynsha Bas basqarmasynyń 2018 jylǵy 6 maýsymdaǵy sheshimimen Ertaevqa 2017 jylǵy qarasha aiynda Resei Federatsiiasynda turýǵa berilgen quqyǵynyń kúshi joiyldy", - delingen habarlamada.
Sondai-aq, vedomstvo ókilderi reseilik áriptestermen ózara is-qimyl jasasyp, Ertaevty Qazaqstanǵa ekstraditsiialaý boiynsha jumysty jalǵastyryp otyr.
Eske salaiyq, Jomart Ertaev 2018 jyly 16 maýsymda 40 táýlikke úi qamaýyna alynǵan bolatyn.
Qazaqstan IIM Interpoly Ulttyq ortalyq biýrosynyń suranysy boiynsha asa iri kólemde alaiaqtyq jasady degen aiyppen halyqaralyq izdeýde bolǵan QR azamaty Ertaev Jomarttyń ustalǵany aitylady.
"Ol "Bank RBK" AQ direktorlar keńesiniń tóraǵasynyń keńesshisi bola otyryp, kelisilgen JShS-larǵa 80 million dollar kóleminde banktik qaryz berýdi lobbilegen, sondai-aq, alǵan qarajattardy aldaǵy ýaqytta qaitarmaý maqsatynda áreket etken", - dep habarlaǵan edi ministrlik ókilderi.
