Qazaqstan Respýblikasynyń Din isteri jáne azamattyq qoǵam ministri Nurlan Ermekbaev Qostanai oblysynyń azamattyq qoǵam ókilderimen kezdesip, Memleket basshysynyń Qazaqstan halqyna Joldaýynyń negizgi baǵyttaryn túsindirdi.
Kezdesý barysynda qatysýshylardyń biri ministr Ermekbaevqa suraq qoiyp, Ministrlik pen Qazaqstan musylmandary dini basqarmasynyń arasyndaǵy ózara is-qimyldy bes baldyq shkala negizinde qalai baǵalaitynyn surady.
«Biz Qazaqstandaǵy barlyq resmi tirkelgen dini birlestiktermen, sonyń ishinde Qazaqstannyń eń iri dini birlestigi - Qazaqstan musylmandary dini basqarmasymen de syndarly qarym-qatynasta jumys jasaimyz», - dedi ministr Nurlan Ermekbaev.
N. Ermekbaevtyń aitýynsha, ministrlik dini basqarmaǵa ártúrli baǵyttaǵy mańyzdy máselelerdi sheshýde qoldaý kórsetedi.
«Dini saladaǵy barlyq usynystarymyz ben sheshimderimiz boiynsha biz QMDB basshylyǵymen aldyn-ala konsýltatsiialar ótkizemiz, olarmen keńesemiz, sondai-aq basqa da iri konfessiialar basshylyǵymen keńesemiz. Sondyqtan, Mýftiiatpen ózara bailanysmyzǵa bes degen baǵa beremin. Sondai-aq Qazaqstandaǵy ekinshi úlken konfessiia bolyp tabylatyn Orys pravoslavie shirkeýimen de ózara is-qimylymyzdy bes degen ballmen baǵalaimyn. Al, is-qimyl áriptestigimiz belsendi júrmei otyrǵan ózge konfessiialarmen bailanysymyzdy 4 ballmen baǵalaýǵa bolady. Biraq odan tómen emes» - dep jaýap berdi Nurlan Ermekbaev.
Esterińizge sala keteiik, 23-24 aqpan kúnderi ministr Nurlan Ermekbaev Qostanai oblysyna jumys sapary barysynda oblys ákimi Arhimed Muhambetovtyń halyq aldyndaǵy eseptik kezdesýine qatysty. Sondai-aq, ministr oblystaǵy birqatar uiymdardy, óńirdegi mádeni jáne rýhani nysandardy aralady. Onyń shinde Aimaǵanbetqajy Spanuly atyndaǵy oblystyq meshitine baryp, imamdarmen kezdesýinde QMDB-nyń oblystyq filialy jumysyndaǵy máselelerdi talqylady.
