Din salasyndaǵy jumystardy úilestirý úshin Úkimet janynan vedomstvoaralyq komissiia qurylady. Bul týraly Ortalyq kommýnikatsiialar qyzmetindegi brifingte elimizdiń Din isteri jáne azamattyq qoǵam ministri Nurlan Ermekbaev málim etti, dep habarlaidy QazAqparat.
«Din salasyndaǵy kóptegen vedomstvolardyń jumysyn úilestirý úshin Úkimet janynan vedomstvoaralyq komissiia qurylatyn bolady. Osy oraida ministrlik dindi teris maqsattarǵa paidalanýǵa umytylatyn kez kelgen áreketke jol bermeý jáne jolyn kesý úshin barlyq sharalardy qabyldaityndyǵyn atap aitqym keledi»,- dedi ol.
Onyń aitýynsha, dini ekstremizm men terrorizmniń aldyn alý jumystary negizgi 2 baǵytta, atap aitqanda jalpy profilaktika jáne maqsatty reabilitatsiialaý jumystary arqyly júrgiziletin bolady.
«Jalpy profilaktika qoǵamda dini ekstremistik ideologiiany jaqtyrmaý ahýalyn qalyptastyrýdy, dinge qyzyǵýshylyq tanytatyn turǵyndardyń saýatyn kóterýdi kózdeitin bolady. Al maqsatty reabilitatsiia, iaǵni ońaltý táýekel toptar men ekstremistik aǵymdardyń ideologiialaryna erip ketken adamdardy teologiialyq turǵydan dástúrli senimge qaitarý maqsatynda jeke jumystar júrgizý arqyly iske asyrylady. Bul baǵyttaǵy sharalar barysynda Ishki ister ministrliginiń túzeý mekemelerinde, iaǵni koloniialarda jazalaryn óteýshilerge erekshe nazar aýdarylady», - dedi Ermekbaev.
