QR Din isteri jáne azamattyq qoǵam ministrligi qoǵamnyń pikirin eskere otyryp, úkimettik emes uiymdarǵa granttar bólýdiń jańa erejelerin jasap shyqty, dep xabarlaidy Ult.kz tilshisi QazAqparat agenttigine silteme jasap.
Osynyń arqasynda úkimettik emes uiymdarǵa grant bólý júiesi jeńildetilmek. Bul týraly búgin QR Din isteri jáne azamattyq qoǵam ministri Nurlan Ermekbaev xalyqpen ótkizgen kezdesýde málim etti.
"Jańa ereje engizilgende grant bólý jumystary qarapaiym bolady. Sarapshylyq komissiiany qurý tártibi egjei-tegjeili jazyldy, ol komissiiaǵa qandai sarapshylar tartylatyny da kórsetilip otyr. Grant berýshi kózderdiń tizimi de keńeiedi. Sizder bilesizder, granttardy táýelsiz operator - Azamattyq bastamalardy qoldaý ortalyǵy úlestiredi. Qazir ol operatordyń qory tek biýdjet esebinen tolyǵa alatyn bolsa, keleshekte oǵan ákimdikterdi jáne táýelsiz demeýshilerdi qosýdy josparlap otyrmyz", - dedi Ermekbaev.
Ministrdiń sózinshe, ÚEU men sarapshylyq qaýymdastyqtyń pikiri ministrlik úshin mańyzdy.
"Árdaiym ashyq dialogta bolý basty mańyzǵa ie. Ministrlik ÚEU men sarapshylyq qaýymdastyqtyń pikirine qarap, óz baǵytyn aiqyndaidy. Bizdiń ministrlik ÚEU-ny basyp-janshý úshin qurylǵan joq. Keibir sarapshylar kerisinshe jazyp júr, biraq ol olai emes, onyń barlyǵy qate túsinik pen dáleldenbegen úrei", - dedi ol.
Byltyr ministrlik VII Azamattyq forýmdy ótkizdi, oǵan shamamen 300-den astam úkimettik emes uiym qatysty. Ermekbaevtyń aitýynsha, forým barysynda Azamattyq forýmnyń usynys jospary jasaqtaldy. Ol ÚEU men Úkimettiń birlesken jumysyna 2 jyldyq jospar qurýǵa sep boldy.
