Qorǵanys ministri, general-maior Nurlan Ermekbaev Arys qalasyna bardy, dep habarlaidy vedomstvonyń baspasóz qyzmeti.
Jumys sapary barysynda Ermekbaev jarylys saldaryn joiý boiynsha berilgen tapsyrmalardyń oryndalýyn tekserip, sondai-aq áskeri bólimdi kóshirý jáne oq-dárilerdiń bólshekterin joiý máselelerin jeke baqylaýyna aldy.
Sonymen qatar qorǵanys ministri qala mańyn aralap, oq-dári men qarý-jaraq tasityn konteinerlerdi, áskeri qyzmetshilerdiń dalalyq lagerdegi turmysyn, ushqyshsyz ushý qurylǵylaryn dalalyq basqarý pýnktindegi jumys jaǵdaiymen tanysty, sondai-aq jerlerdi minasyzdandyrý men tazartý jónindegi injenerlik bólimshelerge qaraityn jeke quramnyń nusqaýlyqtaryn tekserdi.
Ermekbaev jinaý pýnktinde oq-dári bólshekterin joiý jumysy tekserip, "Ońtústik" óńirlik qolbasshylyǵy áskerleriniń qolbasshysy general-maior Qaidar Qaraqulovtyń oqiǵa saldaryn joiý týraly baiandamasyn tyńdady. Kei másele boiynsha shuǵyl sheshimder qabyldandy.
Sondai-aq Arys qalasynda oqiǵa saldarynan qaza bolǵan áskeri qyzmetshilerdiń otbasylaryn aralap, olardyń jaqyndary men týystaryna kóńil aitty. Ol ár áskeri qyzmetshi áskeri mindetin adal oryndap, óz isiniń kásibi sheberi ekenin atap aitty.
Arystaǵy jarylys
24 maýsym kúni tańerteń Túrkistan oblysy Arys qalasynda jarylys boldy. Qala mańyndaǵy áskeri bólimniń qoimasynda órt shyǵyp, oq-dári jaryla bastaǵan.
Jergilikti turǵyndardyń úreii ushyp, úilerin tastap qashty. Sodan keiin halyqty Shymkent jáne basqa kórshiles eldi mekenderge evakýatsiialaý bastaldy.
Jarylys saldarynan úsh adam qaza tapqan: bir turǵyn jáne eki áskeri qyzmetker.
Arystaǵy jarylysqa qatysty Qylmystyq kodekstiń 462-baby 3-bólimi boiynsha sotqa deiingi tergeý amaldary júrip jatyr.
