QR Prezidenti Qasym-Jomart Toqaevtyń Jarlyǵymen jappai tártipsizdik kezinde qaza tapqan politseiler men áskeriler memlekettik nagradalarmen marapattalǵan bolatyn. Sol búlikte erlikpen kóz jumǵan batyrlardyń biri Taraz qalalyq politsiia basqarmasy 1-bóliminiń ýchaskelik inspektory, politsiia kapitany Rahat Slanbekov, dep habarlaidy QazAqparat.
Memleket basshysynyń tapsyrmasyna sáikes oblys ákimi Berdibek Saparbaev II dárejeli «Aibyn» ordenin marqumnyń anasyna tabys etti. Sondai-aq artynda jary, bes ul-qyzy qalǵan batyrdyń otbasyna 3 bólmeli páterdiń kilti berildi.
QR Ulttyq ulannyń 5513 áskeri bóliminde ótken sharaǵa Rahat Slanbekovtiń otbasy, týǵan-týystary men áriptesteri qatysty. Olar marqumdy bir minýt únsizdikpen eske aldy.
Aimaq basshysy syn saǵatta erlik tanytqan Rahattyń esimi el jadynda máńgi saqtalatynyn atap ótti.
«Memleket basshysy Qasym-Jomart Toqaev el tynyshtyǵyn kúzetý jolynda, qaskóilerge qarsy kúreste opat bolǵan batyrlardy túrli memlekettik nagradalarmen marapattap, laiyqty qurmet, otbasylaryna qajetti kómekter kórsetýdi tapsyrǵan bolatyn.
Búlikshilerdiń qolynan qaza tapqan Rahattyń erligi men órligi óziniń áriptesterine, keiingi jas urpaqqa úlgi-ónege. Ol qyzmettik mindetin abyroily, adal atqara otyryp, óziniń naǵyz patriot, eljandy er azamat ekenin dáleldep ketti. Eldiń amandyǵy, beibit turǵyndardyń tynyshtyǵy jolynda ózin qurban etti. Rahat sekildi batyr ulandardyń esimin eli eshqashan umytpaidy.
Arystai azamattyń qazasy bárimizge aýyr tidi. Otbasy men jaqyn týystaryna qaiǵyra kóńil aitamyz. Artynda qalǵan ul-qyzdaryna tek jaqsylylyq, uzaq ǵumyr tileimiz», - dedi oblys ákimi Saparbaev.
Aimaq basshysy týǵan jerin, qalasyn qorǵaý kezinde kóz jumǵan áskerilerdiń, politsiia men qaýipsizdik salasy qyzmetkerleriniń otbasylaryn memleket tarapynan qoldaý sharalary jalǵasatynyn, jergilikti ákimdik te árkez kómektesýge ázir ekendigin jetkizdi.
Óz kezeginde Rahattyń anasy Ulbosyn Japarova Otan úshin opat bolǵan ulynyń qazasyna kóptiń ortaqtasqanyna, erligi eskerýsiz qalmai, Memlekettik nagradamen marapattalǵanyna yqylasyn bildirip, eldiń amandyǵyn tiledi.
